Tổng Bí thư pơma dơnuh găh dôm tơdrong jơnei tih tên, tôm tơdrong mă Việt Nam hơdrin iŏk đei, pơm tơiung tơdrong jang tih, tơmam ‘lơ̆ng, anih dơ̆ng, bưng ai apŭng plĕnh teh nhen hrei ‘nâu; sơkơ̆t hơdăh trong jang tơbôl hiôk hian, pơm tơm kơdih, lơ pang, lơ tơdrong pơvei jang tơbôl, lơ̆m noh ling lang lăng kăl tơdrong pơvei hăm dôm teh đak tơ jê̆.

Thủ tướng Anwar Ibrahim roi tơbăt hăm ƀok Tổng Bí thư Nguyễn Phú Trọng găh pơtôch ‘măng pơma đam hăm Thủ tướng Phạm Minh Chính, pơma hơdăh ‘meh vă pơtrŭt jang hơdai tôm tơdrong hăm Việt Nam, lơ̆m noh đei tơdrong pơvei đảng, vang tơgŭm tơdrog hlôh vao chĕp kơ̆l păng hơtŏk tơiung, jang hơdai mŭk drăm, khŭl linh, sơđơ̆ng păng lơ̆m dôm tơdrong jang ‘nao nhen mŭk drăm kơ sô̆, sơđơ̆ng mạng păng tơjră hăm dôm long nol sơđơ̆ng tam mă ƀyơh đei. Ƀok Thủ tướng tơroi nơ̆r tơgop hăm ƀok Tổng Bí thư găh tơdrong tang găn sa pơgơ̆m pơ jĭp, ưh kơ ‘lơ̆ng tơ̆ Malaysia păng ‘meh vă 2 păh pơtrŭt jang hơdai, tơroi băl tơdrong hlôh vao lơ̆m tơdrong jang ‘nâu. Ƀok Tổng Bí thư Nguyễn Phú Trọng tơƀôh đon lui ngeh ‘noh jĭ ‘măng năm ngôi đơ̆ng ƀok Thủ tướng Anwar Ibrahim ‘noh jĭ tơdrong hơiă ‘nao, tơgop pơtrŭt tơdrong hơtŏk tơiung đơ̆ng tơdrong pơvei jang hơdai gĭt kăl đơ̆ng 2 teh đak.