Hơmet ăn Hop akŏm Đảng lơ̆m teh đak ‘măng mă 14 tơchĕng hơdrol pơgơ̆r lơ̆m khei 1/2026 tơ̆ Hop akŏm ‘măng mă 8 Anih chĕp kơ̆l pơgơ̆r Trung ương Đảng jăl 13 ‘nao âu hlôi tơchơ̆t pơjing 5 khŭl jang, lơ̆m noh đei Khŭl jang hla ar kăl. Khŭl jang hla ar kăl đei hơnăp jang hơmet ăn Hla ar tơroi tơbăt chĭnh trĭ păng Tơroi tơbăt pơtôch 40 sơnăm tơplih ‘nao pơtruh ăn Hop akŏm 14 kơ Đảng. Vă tơgŭm tơdrong ăn Khŭl jang Hla ar kăl, Ban Bí thư kŭm hlôi tơchơ̆t pơjing Grŭp chih hơmet ming hla ar kăl, truh dang ei, khŭl chĕp pơgơ̆r Khŭl jang hlôi pơma dơnuh, ăn tơgop nơ̆r, drơ̆ng nơ̆r hăm tơdrong tơchơ̆t, tơdrong jang, trong tơlĕch jang tơdrong bơ̆jang păng klăih song tơdrong jang đơ̆ng Grŭp chih hơmet ming... Iung pơma tơ̆ hop akŏm, Tổng Bí thư Nguyễn Phú Trọng pơma hơdăh, Hop akŏm bơngai tang măt lơ̆m teh đak ‘măng mă 14 kơ Đảng ‘noh jĭ tơdrong jang chĭnh trĭ tôch kơ gĭt kăl, gô jing 1 tơdrong gĭt kăl lơ̆m jăl trong hơtŏk tơiung kơ teh đak bơ̆n.

Tổng Bí thư Nguyễn Phú Trọng tơroi rơđăh, tơdrong hơmet ăn dôm hla ar kăl ăn Hop akŏm 14 kơ Đảng, lơ̆m noh Hla ar tơroi tơbăt chĭnh trĭ ‘noh jĭ hla ar tơroi tơbăt tơm, đei hơnăp jang tơƀôh trong ăn dôm hla ar kăl nai kơ Hop akŏm, yua thoi noh athei đei pơgơ̆r 1 trong ‘lơ̆ng, tơpăt, tơplih ‘nao lơ̆m trong jang, athei vei sơđơ̆ng mă tơpă đei ‘lơ̆ng, tơroi tơbăt tôm yan âu tơplih ‘nao kơ teh đak, vei sơđơ̆ng tơdrong jơnei đơ̆ng Hop akŏm.