Pơma pơih blŭng jơ bơ̆jang, Tổng Bí thư Tô Lâm lăng ‘lơ̆ng Hla ar chih roi tơbăt đơ̆ng Khŭl chih hơlen dai tôm tĕch păng đei tơdrong ‘nao, hơdai hăm pơma hơdăh; Kiơ̆ đơ̆ng tơchĕng hơlen yak blŭng hla ar chih ăn ƀôh Khŭl chih hơlen hơmet ăn tôch kơ ‘lơ̆ng, đei lơ tơdrong ‘nao pơting hăm dôm hla ar roi tơbăt hơdrol, mă lei pơting hăm tơdrong kăl đơ̆ng Hop akŏm 14 hla ar chih ming dôm hla ar kăl lơ̆m noh đei roi tơbăt chĭnh trĭ, roi tơbăt mŭk drăm tơpôl kăl kơ hơnơ̆ng hơtŏk ‘lơ̆ng hloh dơ̆ng.

Anih tơm Chĭnh trĭ, Ban Bí thư hlôi drơ̆ng nơ̆r trĕng lăng chăl ‘nao, chăl hơtŏk tơiung pơdrŏng pran kơ Teh đak đơ̆ng Hop akŏm 14 kơ Đảng. ‘Nâu kŭm jing trong gơh jang ‘nao lơ̆m tơdrong pơjing dôm hla ar kăl đei Trung ương 10, dôm Kơdră chĕp kơ̆l Anih tơm Chĭnh trĭ, Ban Bí thư păng dôm kơdră so chĕp kơ̆l Đảng, teh đak drơ̆ng nơ̆r tôch kơ ‘lơ̆ng. Tổng Bí thư tơrĕk truh, ‘meh bơ̆jang đei dôm tơdrong hơgăt ‘nâu athei đei tơdrong hơdrin tôch kơ tih, hloh tơdrong hmă, tơgĕch jơ năr, 1 jơhngơ̆m đon, vang jang hơdai păng athei đei dôm trong jang ‘lơ̆ng vă năm hrĕch, sơng hơdrol, veh ver tơdrong tơlĕch ăn tơdrong hơgăt mă lei ưh kơ bơ̆jang kiơ̆ đei.