Tổng Bí thư Tô Lâm tơchĕng ‘lơ̆ng tơdrong tơƀâp đe hŏk tro, sinh viên Việt Nam - Trung Quốc hŏk pơhrăm tơ̆ teh đak băl lơ̆m rim khei ‘năr”, jĭ jơ năr vă roi tơƀôh găh tơdrong pơvei Việt - Trung, mă loi ‘nŏh roi tơbăt hơnăp jang, đon pơhnŏng đơ̆ng hŏk tro, sinh viên 2 teh đak lơ̆m rim jăl sơnăm hăm tơdrong tưk tơiung trong jang ăn chăl jang tŏk ‘nao đơ̆ng rim Đảng, rim teh đak păng tơdrong pơvei đơ̆ng 2 hơdrĕch hơdrung.

Hăm tơdrong gĭt kăl thoi noh, Tổng Bí thư Tô Lâm pơma tơƀôh 1,2 tơdrong ăn đe druh dăm, sơnăm mơlôh kơ 2 teh đak lơ̆m noh kăl pơm hơtŏk đôn hlôh vao găh chăl arih adrol sơ̆ păng pơm hơtŏk ‘lơ̆ng tơdrong pơvei Việt - Trung, druh dăm 2 teh đak čhôk ‘nă păng hơnơ̆ng tưk tơiung, hơnhăk tơdrong pơvei 2 teh đak tŏk ‘lơ̆ng hlŏh dơ̆ng. Găh noh dơ̆ng, druh dăm 2 teh đak oei athei adrin hŏk pơhrăm, jang khoa hŏk kơmăy kơmŏk gơ̆h hơgei vă tơgop ‘lơ̆ng ăn tơdrong jang kơmăy kơmŏk, tưk tơiung khul bơngai jang rơgei tơ̆ rim teh đak, hơmet kơjăp tơdrong pơvei 2 tehđak.