Lơ̆m ‘măng năm ngôi tơ̆ teh đak Singapore, pơgê 13/3, Tổng Bí thư Tô Lâm kŭm hăm khul tang măt ăn Việt Nam đei ‘măng năm ngôi păng bơ̆ jang tơ̆ tơnŏk duk Pansir Panjang – 1 lơ̆m dôm tơnŭk duk container ‘lơ̆ng hlŏh tơ̆ tơring Đông Nam Á vă hơlen năng trong jang xa, man anih jang, pơm trong tơ̆ tơnŏk duk đak dơsĭ kơ teh đak Singapore. Tơ̆ tơnŏk duk Pansir Panjang, Tổng Bí thư Tô Lâm păng khul jang đei ƀok Nelson Quek, Kơdră pơgơ̆r tơring Đông Nam Á păng dôm kơdră chĕp kơ̆l Grŭp jang PSA Singapore roi tơƀôh trong jang tŏk, dôm tơdrong jơnei tih păng gĭt kăl vă jang tŏk tơ̆ hơnăp kơnh kơ Tơnŏk.

Tổng Bí thư Tô Lâm hơiă păng tơchĕng ‘lơ̆ng dôm tơdrong jơnei đơ̆ng tơnŏk duk păng ăn tơbăt, sơnăm 2024 Việt Nam iŏk đei jên đơ̆ng tĕch mơdro xa hăm teh đak đe dang 800 ti USD păng oei adrin vă iŏk đei truh 1.000 ti USD lơ̆m sơnăm 2025, yoa thoi noh trong đak dơsĭ păng tơnŏk đak dơsĭ tôch gĭt kăl lơ̆m tơdrong pơm ‘lơ̆ng ăn tơdrong tĕch mơdro đơ̆ng Việt Nam. Kiơ̆ đơ̆ng noh, Tổng Bí thư hơpơi ‘mĕh PSA jăh đei măt tơ̆ Việt Nam vă jang hơdoi atŏk tơiung tơnŏk duk đak dơsĭ tơ̆ Việt Nam yoa tơdrong juăt jang đơ̆ng Singapore găh tơdrong ‘nâu tôch kăp gĭt hăm Việt Nam lơ̆m khei ‘năr vă hơmet pơ ‘lơ̆ng tơnŏk đak dơsĭ păng atŏk tơiung anih jang logistic.