Tơ̆ pơma đam, Ƀok kơdră tơm Singapore pơma hơdăh ‘măng năm tơmang đơ̆ng Tổng Bí thư trŭh tơ̆ Singapore jing tơdrong bơ̆ jang tôch gĭt kăl, hăm tơdrong pơm hơtŏk tơgoăt tơgoăl jing jang hơdoi tôm tong, tơgum ăn pơih trong ‘nao lơ̆m tơgoăt tơgoăl dih băl ƀơ̆t khei ‘năr gĭt kăl kơ ƀar teh đak, pơjing đei hơyak pran kơtang păng chơt hơ iă ăn kon pơlei păng hơnih mơdro sa kơ ƀar teh đak. Pơma tơbăt dơ̆ng lăp đon hăm tơdrong atŏk tơ iung tĕnh koăng kơ Việt Nam, Ƀok kơdră tơm Singapore pơma tơbăt jơhngơ̆m đon lui Việt Nam gô vei kơjăp hơnih dơ̆ng ‘noh mĭnh lơ̆m rim teh đak jang mŭk drăm hơbĕch hơbal hloh lơ̆m tơring, hăm tŏk GDP ‘lơ̆ng hơ iă, tơdrong tơmơ̆t jên jang ‘lơ̆ng liĕm păng hơnih dơ̆ng apŭng plĕnh teh hơnơ̆ng đei tŏk kơtang. Tổng Bí thư lăp đon hăm nơ̆r pơma đơ̆ng Ƀok Kơdră tơm Singapore găh tơdrong ƀar teh đak atŏk kơtang tơgoăt tơgoăl, jang hơdoi dih băl păng hăm rim teh đak ASEAN vă pơm hơtŏk jơhngơ̆m pran, kĕ iung tơjră hăm dôm tơdrong long đơ̆ng găh ‘ngoăih.