Hơnơ̆ng rim tơdrong pơgơ̆r jang lơ̆m ‘măng iung năm tơmang teh đak Indonesia păng năm tơmang Ban Thư ký ASEAN, pơgê brei (10/3) Tổng Bí thư Tô Lâm vang năm jơ pơma dơnuh hăm khul kơdră jang mơdro sa ƀlep lơ̆m năr tơbăt 70 sơnăm tơgoăt tơgoăl jang tơbôl Việt Nam-Indonesia hăm hơnăn "Việt Nam hăm Indonesia: Tơgoăt tơgoăl jang hơdoi kơ yuơ tơdrong gơh hơgei păng pơdrŏng hơnŭk hơnoa”. Iung pơma tơ̆ jơ pơma dơnuh, Tổng Bí thư Tô Lâm hôn bơnê kơ tang rim tơdrong jang hơdoi tơmơ̆t jên jang, mơdro sa iŏk đei jơnei ƀar păh Việt Nam hăm Indonesia lơ̆m khei năr ou ki păng ‘meh vă hơnơ̆ng sơng iŏk đei tơdrong lui yom, vang yak hơdoi, tơgŭm djru đơ̆ng Khul kơdră chĕp pơgơ̆r Teh đak, rim hơnih bơ̆ jang, tơpôl hơnih mơdro sa Indonesia khei năr ou kơnh. Tổng Bí thư athei, rim bơngai tơmơ̆t jên jang ƀar teh đak gô chă tơchĕng hơlen, pơih să tơmơ̆t jên jang lơ̆m rim tơdrong jang nhen khoa hŏk kmăi kmŏk, tơplih ‘nao tơchăr, chă tơchĕng hơlen păng atŏk tơ iung, atŏk tơ iung tơdrong jang kmăi kmŏk pơm tơlĕch chip bán dẫn, jang kmăi kmok gơh hơgei (AI), internet vạn vật (IOT); ŭnh hơyuh hle (nhen hydrogen), ŭnh hơyuh rơgoh ‘lơ̆ng; jên hu, hơnih tơm jang jên hu; kmăi kmŏk sinh hŏk, jang pơgang …Việt Nam roi năr roi sơkơ̆t hơdăh hơnăp jang kăl lơ̆m tơdrong tơmơ̆t jên jang ‘nao kơ apŭng plĕnh teh, mă kăl lơ̆m rim tơdrong jang kmăi kmŏk điên tư, khoa hŏk, kmăi kmŏk, tơplih ‘nao tơchăr, chip bán dẫn, mŭk drăm kơsô̆, mŭk drăm rơgoh ‘lơ̆ng.