Lơ̆m 5 năr, Tổng Bí thư hlôi đei hloh 40 tơdrong jang hăm dôm tơdrong pơma đam, tơƀơ̆p hăm đe kơdră kơpal, pơtruh nơ̆r gah tơchơ̆t pơm jang, tơƀơ̆p kon pơlei Việt Nam tơ̆ 2 teh đak păng năm tơmang minh ƀar anih jang mŭk drăm, jang gah joh ayŏ. Ƀơ̆t 'măng ou, rim anih jang, rim tơring, anih jang mŭk drăm Việt Nam păng 2 teh đak hlôi kĭ pơkăp lơ tơchơ̆t jang hadoi lơ̆m lơ tơdrong jang, lơ̆m noh đei pơtho pơhrăm, tang găn păng tơjră tơdrong pơm kơnê̆ găn lơ teh đak, jang ka hơdang, mŭk drăm kơmăi sô̆, tơplih kơmăi sô̆, tơplih jơk, jên hu.

Hơdrol kơ noh ah 'năr dơ̆ng năr 13/3, ƀok Tổng Bí thư Tô Lâm hlôi truh akŏm păng iung pơma lơ̆m 'măng pơma đam anih jang mŭk drăm Việt Nam- Singapore hăm hơnăn “Việt Nam – Anih truh akŏm kơ anglŏ sơnăm khua hŏk kơmăi kơmŏk hơgei păng jang hadoi gah jên hu”, hăm tơdrong vang akŏm đơ̆ng jê̆ 100 anih jang mŭk drăm kơ 2 teh đak. Ƀok Tổng bí thư ăn tơbăt, khei năr truh Việt Nam pơtoi hơvơn dôm tơdrong jang FDI lơ̆m dôm tơdrong jang nhen khua hŏk kơmăi kơmŏk hơgei, tơplih 'nao lơ̆m hơlen chih akŏm păng hơtŏk tơ-iung, mŭk drăm jơk, mŭk drăm kơmăi sô̆, tơplih kơmăi sô̆, pơm tơlĕch unh hơyuh sơđơ̆ng 'lơ̆ng.