Tổng Bí thư Nguyễn Phú Trọng ‘noh jĭ kơdră chĕp pơgơ̆r gơ̆h hơgei kơ Đảng, teh đak păng kon pơlei bơ̆n, đei tôm jơhngơ̆m đon ‘lơ̆ng hơ iă, gơ̆h hơgei, nuih mơng kơ jơhnơr chĕp pơgơ̆r Việt Nam lơ̆m chăl tơplih ‘nao. Lơ̆m prăt chăl sơnăm bơ̆ jang kĕch mang, bơ̆ jang tơ iung pơjing, ming hơmet Đảng păng Khul jang chinh trĭ jĭ dôm tơdrong jang kăl hloh hăm Tổng Bí thư Nguyễn Phú Trọng. Tổng Bí thư Nguyễn Phú Trọng hlôi atŭm hăm Khul kơdră chĕp pơgơ̆r Trung ương pơchoh trong păng chĕp pơgơ̆r jang kiơ̆ jơnei rim trong jang kăl găh tơ iung pơjing, hơmet ming Đảng; kơrŭn đĭ ai iung tơjră hăm jơhngơ̆m đon ưh kơ ‘lơ̆ng, hơrih sa ưh kơ ‘lơ̆ng, tang găn sa pơgơ̆m pơjĭp, jang ưh kơ ‘lơ̆ng lơ̆m Đảng. ‘Nou jĭ ‘măng iung tơjră “ayăt kơdih” tôch mơmat tat gleh hrat pơm ăn kơ Đảng bơ̆n roi năr roi rơgoh ‘lơ̆ng, pran kơtang, sơkơ̆t hơdăh hơnăp jang pơm jŭk yŭk trong hơlou, nuih mơng, gơh hơgei, vă Đảng bơ̆n tơpă “jĭ oei sa ‘lơ̆ng, jĭ gơh hơgei”.