Sơng yă Trần Thị Lâm, kơdră tơgŭm jang ăn anih jang Shangri – La Healthcare Invesment, Ƀok Tổng Bí thư Tô Lâm bơnê kơ anih jang mŭk drăm asong jang gah pơgang hơmet jĭ jăn, pơtruh nơ̆r hơtŏk tenh tơdrong asong jang tŏk bŏk oei pơm jang, pơtoi asong jang, mă kăl noh gah dôm tơdrong jang kiơ̆ kơmăi kơmŏk 'nao gơh hơgei, 'lơ̆ng hăm cham char. Ƀok Tổng Bí thư ăn tơbăt, Việt Nam gô pơtoi pơm trong hiôk ăn anih asong jang, atŭm hăm noh pơtruh nơ̆r hăm dôm anih jang kơpal, jơnŭm pơgơ̆r tơring yak hadoi hăm anih asong jang vă pơtoi pơm jang.

Sơng ƀok Lim Boon Heng, Kơdră Anih jang Temasek, Tổng Bí thư Tô Lâm ră hơdah tơdrong tơrĕk đơ̆ng Việt Nam lơ̆m hơtŏk mŭk drăm tơ-'ngla pơm tơm păng ăn tơbăt, Việt Nam adoi tơbang dôm tơchơ̆t jang hơtŏk mŭk drăm, athei jang kiơ̆ kơmăi kơmŏk 'nao, bơngai jang hơgei, păng tơdrong asong jang đơ̆ng teh đak đe, kơyuơ noh dôm Jên mong asong jang noh gĭt kăl. Lơ̆m khei năr ou, Việt Nam adoi pơma đam gah dôm tơchơ̆t jang tĕch pơdro hiôk hian, pơma đam hăm dôm anih jang hadoi vă sek tơlang dôm tơdrong oei tơnap tap gah tĕch pơdro, vei sơđơ̆ng tơdrong asong jang ƀônh hiôk ăn dôm anih asong jang, lơ̆m noh đei dôm anih asong jang đơ̆ng teh đak Singapore.