Tổng Bí thư Tô Lâm sơng Thượng Ngĭ si Hoa Kỳ Steven David Daines
Thứ sáu, 10:26, 21/03/2025
Lan chih tơblơ̆
Lan chih tơblơ̆
VOV4.Bahnar – Năr 20/3, tơ̆ Anih jang Trung ương Đảng, Ƀok Tổng Bí thư Tô Lâm hlôi sơng Thượng Ngĭ si Hoa Kỳ Steven David Daines. Tơ̆ jơ sơng, Ƀok Tổng Bí thư Tô Lâm hưch hanh hăm Thượng ngĭ si Steven Daines 'măng mă blŭng năm tơmang Việt Nam, akhan 'măng năm tơmang jing kăp gĭt, tơgop hơtŏk jang tơbôl Việt Nam - Hoa Kỳ hơtŏk 'lơ̆ng tơnăp.
Tổng Bí thư sơkơ̆t hơdah Hoa Kỳ jĭ minh lơ̆m dôm teh đak kăp gĭt jang hadoi kơ Việt Nam, bơnê kơ Hoa Kỳ pơtoi hơtŏk jang hadoi hăm Việt Nam, tơgŭm Việt Nam “pran, hiôk hian, kơ-'nôh, jơnap”.
Ƀok Tổng Bí thư ră hơdah minh ƀar trong jang vă iŏk tơdrong pran kơ jang tơbôl 2 teh đak lơ̆m khei năr truh noh jĭ: mŭk drăm, tĕch pơdro păng asong jang kăl pơtoi jing tơdrong tơm kăp gĭt kơ tơdrong jang tơbôl 2 pah, pơtoi hơmet pơ-'lơ̆ng tơdrong răm đơ̆ng tơblah tơblŭng, pơih să păng hơtŏk jang hadoi lơ̆m dôm tơdrong mă Hoa Kỳ jang pran păng Việt Nam oei kăl nhen: khua hŏk kơmăi kơmŏk 'nao hơgei, tơplih 'nao hơbĕch hơbal, jang unh hơyuh, jang pơgang, păng choh pơtăm.
Viết bình luận