Tổng Bí thư hôn bơnê, lăng ‘lơ̆ng tơdrong tơgop tơpă păng đei yua đơ̆ng Grŭp jang PE kŭm nhen kơ dih ƀok Nate Franklin hăm tơdrong hơtŏk tơiung kơ Việt Nam lơ̆m tơdrong jang ŭnh hơyuh rơgoh păng tơdrong pơvei Việt Nam - Mi. Tổng Bí thư pơma hơdăh Mi jĭ 1 lơ̆m dôm teh đak jang hơdai mŭk drăm gĭt kăl kơ Việt Nam, tơdrong pơvei Jang hơdai Gĭt kăl tôm tơdrong Việt Nam - Mi tŏk bŏk pơm hơnih hiôk păng ‘lơ̆ng ‘nao ăn dôm anih mơdro sa Mi tơmơ̆t jên jang, tĕch mơdro tơ̆ Việt Nam.

Tổng Bí thư tơroi trong trĕng lăng, đon hơdrin đơ̆ng Đảng, teh đak păng kon pơlei Việt Nam vă bơ̆jang kiơ̆ tơdrong hơgăt hơtŏk tơiung, jing teh đak tŏk bŏk tŏk pơdrŏng, đei kơmăy kơmŏk ‘nao, iŏk yua jô̆ păh lăp lơ lơ̆m sơnăm 2030, păng teh đak pơdrong, iŏk yua lơ lơ̆m sơnăm 2045; pơma hơdăh Đảng păng Khŭl kơdră teh đak Việt Nam gô hơnơ̆ng pơm tơdrong hiôk, lơ̆m noh đei tơdrong hơmet ming trong jang tơgŭm, vă kơ dôm bơngai tơmơ̆t jên jang lơ̆m păng ‘ngoăih teh đak tĕch mơdro đei yua tơ̆ Việt Nam. Việt Nam gô hơnơ̆ng pơkăp hăm tơdrong hơgăt jang đei kơsô̆ ưh kơ đei tơlĕch ‘mê̆ ‘mach lơ̆m sơnăm 2050. Tổng Bí thư athei Grŭp jang PE hơnơ̆ng pơih să jang hơdai, tơmơ̆t jên jang tĕch mơdro tơ̆ Việt Nam, lơ̆m noh đei dôm tơdrong jang tơplih ŭnh hơyuh ‘nao....