Tang măt ăn kơdră chĕp kơ̆l Đảng păng tĕh đak, Tổng Bí thư Nguyễn Phú Trọng pôk pơ ư păng bơnê dôm tơdrong tơgop tih tên đơ̆ng khul chih pơđơ̆k lơ̆m tĕh đak, đơ̆ng Grŭp vei lăng dôm khul chih pơđơ̆k Việt Nam lơ̆m 75 sơnăm âu ki.

Pơma hơdăh anih dơ̆ng gĭt kăl đơ̆ng tơdrong chih pơđơ̆k, Tổng Bí thư Nguyễn Phú Trọng athei, rim khul chĕp kơ̆l đảng, khul kơdră pơgơ̆r đơ̆ng Trung ương truh tơ̆ tơring kăl hlôh vao hơdăh hlŏh dơ̆ng hơnăp jang, anih dơ̆ng đơ̆ng tơdrong jŏh ayŏ kơ dŏ xoang, chih pơđơ̆k lơ̆m tơdrong tơplih ‘nao, pơjing păng vei lăng tĕh đak; hơnơ̆ng pơlung jơhngâm, pơjing tơdrong ‘lơ̆ng hlŏh ăn dôm tơdrong jŏh ayŏ kơ dŏ xoang, chih pơđơ̆k jang tŏk.

Tổng Bí thư hơpơi ‘mĕh păng lui, tơdrong chih pơđơ̆k kơ kăch mang Việt Nam kŭm hăm khul chih pơđơ̆k, hơri hơxoang, phĭn rup hơnơ̆ng tưk tơiung dôm tơdrong jang đei lơ̆m 75 sơnăm âu ki, mă loi ‘nŏh yak hlŏh rim tơdrong pơmat tat, pơlong nol vă đei dơ̆ng lơ ƀai chih, um rup ‘lơ̆ng tơgăl hăm kon bơngai păng tĕh đak Việt Nam ‘lơ̆ng rŏ, ‘mêm kơ eng, pơm lăp hăm tơdrong ‘mĕh vă đơ̆ng kon pơlei.