Đunh kơ âu 70 sơnăm, hăm tơdrong chĕp kơ̆l pơgơ̆r tôch trŏ, gơ̆h hơgei đơ̆ng Đảng, khul linh păng kon pơlei bơ̆n pơjing đei Tơdrong tơblăh jơnei Điện Biên Phủ “Đei ư hơnhang jơ̆p jang tơring – pơm tơdrŏ jơ̆p plei tĕh”, phă hŭt chăl pơm đich đam hnam dông ăn ayăt Phalăng păng tơdrong vang tơblăh đơ̆ng Mi. Tơdrong jơnei đơ̆ng tơblăh ‘nŏh hlôi găn tôch tơdrong tơblăh vang, pơjing dơ̆ng tơdrong rơngei tơ̆ Đông Dương. Ƀât tơdrong rơngei ‘nao đei hơlơ̆k dơ̆ng sơ̆, Điện Biên Phủ jĭ 1 kơdrăn tơblăh đĕch, ưh đei tơmam kiơ yoa đơ̆ng ƀôm ƀrâm phă pơrăm kŭm hăm ƀĕnh tơdrong ơh sơ ‘ngon.

Ƀok Vũ Văn Kiệm, oei tơ̆ phường Mường Thanh, plt Điện Biên Phủ, dêh char Điện Biên ƀlŏk dơ̆ng: “Kơplăh dŏh sơ̆ ƀơ ƀrŏng kơ đei yă kiơ, lăp 3,4 tŏ hnam gŏch đĕch, đơ̆ng Kông A1 tŏk truh jê̆ kơchơ tơm ưh đei anih jang yơ. Điện Biên Phủ tơblăh đei rơngei bơih mă lei kon pơlei oei tơnuh hin hot pơngot rơvĕt, mă loi jĭ kon pơlei kon kông, năr sŏng xa 2 ‘măng ưh kơ phĭ.”

Dôm sơnăm âu ki, Đảng ƀô̆, Khul kơdră pơgơ̆r păng kon pơlei dôm hơdrĕch hơdrung dêh char Điện Biên hơnơ̆ng chĕp răk tơdrong juăt jang kăch mang, hơtŏk jơhngâm đon Điện Biên Phủ kơtang nuih mơng lơ̆m tơdrong jang atŏk tơiung mŭk drăm, tơpôl, mât 1 ƀơ̆r đon, hơmet pơ 'lơ̆ng hiong răm đơ̆ng tơblăh sơ̆. Đơ̆ng 1 kơdrăn tơblăh pŭ ƀĕnh tơdrong răm đơ̆ng ƀôm ƀrâm, hrơm ƀĕnh đak pơ uh pơang, pham lĕch sĕch huŏng đơ̆ng khul linh păng kon pơlei bơ̆n, Điện Biên dang ei đei tơplih tôch 'lơ̆ng, tŏk jing 1 plt 'nao 'lơ̆ng rŏ, gơ̆h hơgei đei ƀôh păng vang mât jang hơdoi tôch pran hăm teh đak. Lơ tơdrong jang tih đei jang đang păng tơmât yoa nhen cham gre păr Điện Biên Phủ gơ̆h păr vih vât hăm 2 tơring jang mŭk drăm tơm kơ teh đak 'nŏh jĭ plt Hà Nội păng plt Hồ Chí Minh.

Dang ei tơring kơdrâm tơ̆ dêh char Điện Biên tŏk bŏk đei pơih xă păng jang tŏk kiơ̆ trong chĕng hơmet tơring, chĕng hơmet dêh char. Tơdrong jang tơproh trong, chĕng hơmet tơring kơdrâm, tơproh trong jang ming man đei năng kăl, jang ‘lơ̆ng păng năm hơdrol 1 hơyak, pơih trong vă pơjing trong jang păng tơlĕch jang dôm tơdrong tơmât jên jang ming man, hơmet ming, atŏk tơiung tơring kơdrâm. Đơ̆ng 2020-2023, dêh char Điện Biên đĭ kĭ ăn dang 20 tơdrong tơproh trong jang tơ̆ dôm tơring kơdrâm, mă loi tơ̆ plt Điện Biên Phủ. Truh dang ei, kơsô̆ tơproh trong jang đei chih hơdăh lơ̆m dêh char dang 36%. Mă loi, đon pơhnŏng truh sơnăm 2025, dêh char vă hơtŏk tơdrong tơplih 'nao tôm tơdrong, pơjing hơyak tŏk pran lơ̆m tơdrong jang atŏk tơiung mŭk drăm, tơpôl, akŏm jơhngâm, tơmam, jên hu man anih jang, pơm trong păng pơjing tơring kơdrâm hrơ̆ch 'lơ̆ng kiơ̆ chăl 'nao.

Dôm tơdrong tơplih ‘nao hơnơ̆ng ‘nŏh ưh lăp pơm ăn tơmoi chă tơmang lăng đĕch mă kơdih kâu kon pơlei tơ̆ Ðiện Biên kŭm ƀôh ưh kơ ê. Ƀok Lò Văn Diên, oei tơ̆ phường Him Lam, plt Điện Biên Phủ tơroi: “Inh ƀôh găh anih jang, trong nơnăm tŏk tôch ‘lơ̆ng, mă loi jĭ dôm sơnăm tơjê̆ âu, yoa thoi nŏh, kon pơlei tôch čhôk ‘nă găh tơdrong jang tŏk mŭk drăm, anih jang, trong nơnăm tơ̆ plt. Kơdih kâu inh păng kon pơlei kŭm hơpơi ‘mĕh tưk tơiung đei jơhngâm pran vă tơgop ăn tơdrong pơjing tơring roi đunh roi tŏk pơdrŏng.”

Ƀok Lê Thành Đô, Kơdră Anih vei lăng kon pơlei dêh char Điện Biên ăn tơbăt: Sơnăm 2022, dêh char Điện Biên dơ̆ng mă 2 găh tơdrong jang tŏk mŭk drăm lơ̆m kơsô̆ 14 dêh char tơ̆ tơring Tŏk bŏk jăl đak krong păng tơring groi kông găh Tu, dơ̆ng mă 24/63 dêh char, plt lơ̆m teh đak, jĭ kơsô̆ jang tŏk lơ hlŏh lơ̆m dôm sơnăm tơjê̆ âu. Tơdrong arih xa kơ kon pơlei găh tơmam drăm păng jơhngâm đon tŏk roi 'lơ̆ng, anih jang, trong nơnăm đei tơmât jên man hrơ̆ch, kơjăp 'lơ̆ng. Sơnăm 2023, tơdrong jang tŏk GRDP kơ dêh char đei dang 7,1%, lơ ƀiơ̆ pơting hăm Tơdrong tơchơ̆t đơ̆ng Hop akŏm Đảng ƀô̆ dêh char tơlĕch, iŏk đei lơ ƀiơ̆ kơsô̆ jô̆ păh lăp lơ̆m teh đak, mât lơ̆m grŭp dơ̆ng hơdrol kơ 14 dêh char tơ̆ tơring tŏk bŏk jăl đak krong păng tơring groi kông găh Tu. Iŏk yoa đơ̆ng chă tơmang lăng đei truh 1.750 ti hlak jên păng jing sơnăm mă blŭng chă tơmang lăng đơ̆ng dêh char sơng đei truh 1 triu 'nu tơmoi.

Sơnăm ‘nâu, dêh char Điện Biên vă tơbăt 70 sơnăm Tơblăh jơnei Điện Biên Phủ păng pơgơ̆r sơnăm Chă tơmang lăng teh đak - Điện Biên 2024, dêh char hlôi kơchăng hơmet ‘lơ̆ng rim tơdrong păng hơmĕng pơjing đei lơ hơyak tŏk pran lơ̆m tơdrong jang atŏk tơiung mŭk drăm, tơpôl tơ̆ tơring Tây Bắc tơ̆ hơnăp kơnh. 

Ƀok Lê Thành Đô pơma hơdăh: “Kăn ƀô̆, bơngai jang kơ teh đak, khul linh, kon pơlei dôm hơdrĕch hơdrung păng khul tơpôl bơngai tĕch mơdro kơ dêh char Điện Biên oei akŏm jơhngâm tưk tơiung tơdrong juăt đơ̆ng Điện Biên Phủ kơtang nuih mơng, hơtŏk tơdrong tơplih ‘nao, gơ̆h hơgei, iŏk yoa ‘lơ̆ng dôm tơdrong pran ‘lơ̆ng đơ̆ng dêh char vă pơjing hơyak tŏk pran kơjăp lơ̆m tơdrong jang mŭk drăm, tơpôl păng vei lăng sơđơ̆ng lơ̆m dêh char. Đơ̆ng noh jang đei jơnei tôch hơiă vă tơbăt 70 sơnăm tơblăh jơnei Điện Biên Phủ.”

70 sơnăm đơ̆ng rŏng kơ tơblăh jơnei đei ư hơnhang jơ̆p jang tơring, pơm tơdrŏ jơ̆p plei teh, jĭ tơdrong tôch gĭt kăl lơ̆m chăl arih, hăm ƀĕnh tơdrong čhôk ‘nă pơjing đei jơhngâm pran tôch ‘lơ̆ng, kŭm hăm jơhngâm pran đơ̆ng mât 1 ƀơ̆r đon, tơguăt đĭ đăng kon pơlei, Đảng ƀô̆, khul kơdră pơgơ̆r păng kon pơlei dôm hơdrĕch hơdrung tơ̆ âu hlôi păng tŏk bŏk hơnhăk Ðiện Biên tŏk jing tơring ang hơdăh rok trong jang tơplih ‘nao tơ̆ tơring găh Pơmât kơ teh đak.