Pơma nơ̆r pơtho tơ̆ hop akŏm, Phó Thủ tướng Trần Lưu Quang pơma hơdăh, Đắk Nông athei chă rơih mă ‘lơ̆ng trong tơmât jên jang, sơng iŏk anih jang truh jang xa. Tơ̆ hơnăp dang ei athei sek tơlang kĕh 2 tơdrong, ‘nŏh jĭ tơproh trong cheng hơmet tơring jang khoáng sản păng tơproh trong iŏk yoa teh. Tơdrong tơproh trong jang dang ei tam mă sek tơlang đei dôm tơdrong tơhlăk, mă lei hlôi tơlĕch đei trong ăn dêh char jang tŏk tơ̆ hơnăp kơnh.

Phó thủ tướng Trần Lưu Quang hơpăh ăn Đắk Nông dôm chư “pơm kiơ̆ ‘lơ̆ng, gơh hơgei, hrơ̆ch ‘lơ̆ng, hlôh vao hơdăh” vă jang tŏk. Tơ̆ hop akŏm, dêh char Đắk Nông pơjao hla ar tơmât jên jang ăn 4 tơdrong jang hăm kơsô̆ jên đei kĭ vă tơmât jang ‘nŏh 1.700 ti. Dêh char oei kĭ pơkăp jang hơdoi hăm 4 anih tơmât jên jang, hăm kơsô̆ jên vă tơmât jang truh 8,4 ti đô la Mi, akŏm găh tơdrong sir iŏk khoáng sản, jang unh hơyuh rơgŏh, choh jang xa hăm kơmăy kơmŏk ‘nao păng 1,2 tơdrong jang nai hai.