Pơm tơm chĕp pơgơ̆r jơ tơƀơ̆p, Chuẩn Đô đốc Nguyễn Hữu Thoan tơbăt: Khei năr au ki, kang ƀô̆, ƀô̆ đô̆i hơnih jang Tơring 5 Ƀô̆đô̆i đak dơsĭ ling lang sơng iŏk đei tơdrong lăng ba, tơgum djru yak hơdoi đơ̆ng lơ tơring, hơnih jang lơ̆m teh đak. ‘Nau jĭ jơhngơ̆m đon hơlêm kơtang hloh vă kang ƀô̆, ƀô̆ đô̆i hơnih au sơđơ̆ng jơhngơ̆m bơ̆ jang, jang keh đang ‘lơ̆ng tơdrong jang đei pơjao.

Tang măt ăn khul kơdră tang măt 10 dêh char, pơlei tơm găh Pơbăh, Kơ iĕng Kơdră chĕp pơgơ̆r Hơnih vei lăng kon pơlei dêh char Vĩnh Long - ƀok Đặng Văn Chính hôn bơnê kơtang dôm tơdrong jơnei lơ̆m jang kiơ̆ tơdrong jang chinh trĭ kơ Tơring 5 Ƀô̆ đô̆i đak dơsĭ adoi sơkơ̆t hơdăh rim tơring gô hơnơ̆ng atŏk kơtang rim tơdrong jang lăng truh đak dơsĭ, achon dơsĭ pơlei pơla hăm dôm tơdrong jang ‘lơ̆ng hơ iă vă hơlêm, tơgŭm djru kang ƀô̆, ƀô̆ đô̆i bơ̆ jang ‘lơ̆ng tơdrong jang đei pơjao, tơgop vei lăng năng tông pơm tơn-‘ngla đak dơsĭ, achon dơsĭ gĭt kăl kơ Teh đak.