‘Nhŏng Rơ Châm Dun, 30 sơnăm, (bơngai Jrai, oei tơ̆ pơlei Ngol Rông, xah Ia Krêl, apŭng Đức Cơ) đei Kŏng ti 74, Binh đoàn 15 iŏk jang kŏng nhơ̆n kôih kơtăk kơsu đơ̆ng blŭng sơnăm âu. ‘Nhŏng ăn tơbăt, hăm jên khei jang 7 trĭu hlj 1 khei, ‘nhŏng hlôi đei tơdrong hơrih sơđơ̆ng hloh: “ Adrol kơ mơ̆t jang kŏng nhơ̆n ‘noh unh hnam tôch tơnap tap, dang ei đei hnam oei, đei tơdrong jang bơih inh adoi hơpơi ‘meh đei sơđơ̆ng, ning nai kơnh kon hơ-ioh đei hŏk pơhrăm, inh hmach bơnê kơ kŏng ti hlôi tơgŭm inh”

Hăm ‘nhŏng Ksor Y Đô oei tơ̆ xah Ia Krêl, apŭng Đức Cơ, đei tơdrong tơgŭm đơ̆ng kăn ƀô̆ lơ̆m Kŏng ti 75, Binh đoàn 15, truh dang ei ‘nhŏng hlôi kơjăp tơdrong jang păng đei pơjao ăn pơgar ‘long vă kôih kơtăk kơsu: “ Mơ̆t jang kôih kơtăk kơsu noh hơtŏk tơdrong hơbĕch jang, hŏk đei lơ tơdrong hlôh vao. Adrol ki tam mă pơhrăm noh tam mă gơh kôih ôh, mơ̆t jang lơ̆m kŏng ti, bơngai pơtho tơƀôh ăn trong kôih noh inh kôih trŏ păng hơbĕch hloh. Đei hŏk pơhrăm, ‘noh inh lui ngeh hăm tơdrong jang po, kơchăng mơ̆t jang kŏng nhơ̆n chă jên pơyua ăn unh hnam”

 Dôm sơnăm kơ âu, Kŏng ti 74, Kŏng ti 75, lơ̆m Binh đoàn 15, (oei tơ̆ apŭng sơlam teh Đức Cơ, dêh char Gia Lai) pơtho ăn jê̆ 2000 ‘nu jang kôih kơtăk kơsu ‘noh bơngai kon kông tơ̆ tơring. Rim anih jang oei pơm jang tơnăp tơdrong hơvơn, pơyua ăn tơpôl, hăm tơdrong asong rơmo yŏng ăn kon pơlei; “Tơgŭm oh năm truh hnam trưng” ăn hơ-ioh hin dơnuh; hơmet ming jăl trong nơnăm, pơm hnam ‘mêm kơ-eng, hnam “Tơguăt tơguăl”, pơgơ̆r xa Têt hăm kon pơlei, asong tơmam kơ unh hnam mă teh đak tơchơ̆t tơgŭm... hăm kơsô̆ jên huach truh kơ tih hlj.

Gah asong tơdrong jang ăn kon pơlei tơ̆ tơring, Đăi tă Trịnh Hà Tâm – Kơdră Kŏng ti 75 - Binh đoàn 15 ăn tơbăt: “Kŏng ti 75 sơnăm kơ âu hlôi iŏk bơngai jang, 100% bơngai jang ‘noh kon pơlei tơ̆ tơring. Ah pơtho pơhrăm jang ‘noh tơgŭm tôm tơmam drăm nhen asong đơ̆ng săng kôih vă đe yĕt hŏk păng pơtho đe sư băt trong jang, kơlih pơkăl đei kih thuơ̆t tơnăp hloh, kơyuơ noh khul bơngai pơtho păng kăn ƀô̆ hơnơ̆ng tơƀôh pơtho păng pơm kiơ̆ 3 tơdrong atŭm hăm bơngai pơm jang”

Sơkơ̆t hơdah sơnong jang kơ Binh đoàn 15 lơ̆m tơdrong pơm jang tơdrong jang kon kông tơ̆ tơring, ƀok Trần Ngọc Phận, Phŏ Kơdră Anih jang vei lăng kon pơlei apŭng Đức Cơ tơroi: “Anih jang kơ Binh đoàn 15 ‘noh dôm kŏng ti tơgŭm ăn tơrin tih tên lơ̆m asong ming man anih jang, kla jên jang ăn kŏng nhơ̆n, mă lơ ‘noh kon pơlei kon kông. Mă kăl gah vei sơđơ̆ng tơpôl, jang atŭm hăm tơring lơ̆m dôm tơdrong jang pơjing tơring tơrang ‘nao noh dôm kŏng ti jang tôch tơnăp. Dôm tơdrong mă kŏng ti kĕ jang tơgŭm ăn tơring tơtenh păng tơtom, asong tơdrong jang, xa jên khei vei sơđơ̆ng ăn tơdrong hơrih”

Đăi tă Khuất Bá Cao, Ƀĭ thư Đang uy, Phŏ Kơdră Binh đoàn 15 ăn tơbăt, athei iŏk bơngai kon kông tơ̆ tơring mơ̆t jang kŏng nhơ̆n noh mă blŭng, jing trong kăp gĭt đơ̆ng Đang uy, Anih tơm pơgơ̆r linh Binh đoàn 15, tơgop hơtŏk mŭk drăm, hơtŏk tơdrong hơrih ăn kon pơlei, vei sơđơ̆ng chĭnh trĭ, vei sơđơ̆ng tơpôl hơrih xa tơ̆ tơring sơlam teh: “Jê̆ 8000 kon pơlei kon kông kơ Binh đoàn đei nhôn tơrĕk tơgŭm. Nhôn hlôi pơgơ̆r dôm anih linh kơ binh đoan pơm jang, hơtŏk pơ-‘lơ̆ng adoi nhen asong hơtŏk pran tơdrong iŏk bơngai kon kông năm jang kŏng nhơ̆n tơ̆ dôm anih jang vă vei sơđơ̆ng iŏk yua, sơđơ̆ng tơdrong hơrih ăn kon pơlei hăm lơ trong jang vă tơgŭm ăn kon pơlei gah tơmam drăm, gre vih vơ̆t, kih thuơ̆t, hơdrĕch, jên jang. Chă tơroi tơbăt hơvơn kon pơlei pơm jang hlôh vao gah kih thuơ̆t, kloh klĕch gah tơdrong jang”