Mŏ Trần Thị Bình, tơ̆ xăh sơlam Ia Dom, apŭng Đức Cơ, dêh char Gia Lai đei iŏk pơm công nhân cao su Khul 2 Công ty 72, Binh đoàn 15 đĭ hlŏh jĭt sơnăm ‘nâu bơih. Mŏ tơroi, hăm jên khei tôch sơđơ̆ng 1 khei hlŏh 7 triu, đơ̆ng rŏng lơ sơnăm, unh hnam mŏ chă răt dơ̆ng mir roh, vă hơtŏk tơdrong choh jang xa, đơ̆ng nŏ mă tơdrong jang xa, arih xa roi đei ƀôh ƀiơ̆, kon hơ ‘lơ̆p đei hŏk pơhrăm ngăl. Yoa thoi nŏh, mŏ hlôh vao kơjăp hơnăp jang đơ̆ng công nhân tơ̆ anih jang mŭk drăm, vei sơđơ̆ng tĕh đak: “Jĭ công nhân tơ̆ anih jang găh tơring sơlam, ưh đei bu chrih kiơ hăm tơdrong choh jang pơgar ‘long, nhôn hơnơ̆ng chă tơroi ăn anih jang păng khul linh dân quân, vă pơm ‘lơ̆ng ăn nhôn choh jang xa păng vei kơjăp tơring sơlam".

Oei tơ̆ tơring sơlam Chư Prông, Gia Lai, gơnơm đei mât jang pơm công nhân lơ̆m Khul 5, Trung đoàn 710, mă tơdrong arih xa kơ unh hnam Kpuih Kớt đei tơplih ‘lơ̆ng. ‘Nhŏng tơroi, klo kăn măr nhi ‘nao jur kơdih, tĕh choh jang xa ưh đei, tĕh kơnê̆ dơ̆ng, kơna tơdrong arih xa tôch pơmat tat. Đơ̆ng blŭng sơnăm 2022, 2 ‘nu klo kăn ‘nhŏng Kớt đêi mât jang pơm công nhân cao su, tơdrong arih xa roi đunh roi sơđơ̆ng: “Dang ei, klo kăn mir nhi da ƀiơ̆ pơmat tat bơih. Blŭng a, ƀât ‘nao mât jang công nhân, anih jang chă trong tơgŭm ăn klo kăn măr nhi. Dang ei unh hnam đei jên khei sơđơ̆ng, mưh jĭ jăn ‘nŏh đei quân y tơgŭm ăn. Tơ̆ hơnăp kơnh, 2 ‘nu klo kăn măr nhi vă adrin jang mă ‘lơ̆ng, hŏk iŏk tơdrong kăl đơ̆ng công nhân so, jang gơ̆h, vă pơm hơtŏk iŏk yoa”.

Pơtăm klĕch 3 xăh sơlam Ia Pnôn, Ia Nan, Ia Dom, 1 păh xăh Ia Kla păng thĭ trơ̆n Chư Ty (apŭng Đức Cơ), pơgar ‘long cao su đơ̆ng Công ty TNHH một thành viên 72, Binh đoàn 15 oei jang xa kơjăp hăm 18 tơring kon pơlei oei xa, pơlei pơla kơ dêh char Gia Lai. Găh to kơ tơring sơlam, công ty kŭm đei dôm anih jang pơtăm ‘long cao su tơ̆ 7 xăh găh 2 apŭng Oyadav păng Bo Keo (dêh char Ratanakiri, tĕh đak Campuchia). Kŭm hăm tơplih ‘nao, hơtŏk tơdrong đei yoa đơ̆ng jang pơgar ‘long, anih jang oei tơlĕch lơ tơdrong vei sơđơ̆ng tơdrong arih xa tơpôl, khăm hơmet jĭ, ƀơk đĕch pơgang, tơlĕch trong ăn unh hnam công nhân bơngai Yoăn hăm bơngai kon kông tơgŭm băl jang atŏk mŭk drăm.

Thiếu tá Phan Tiến Toàn- Phŏ Kơdră chĕp kơ̆l Công ty 72, Binh đoàn 15 ăn tơbăt: “Jĭ anih jang pơm tơ̆ 3 xăh sơlam, rim khei, anih jang ăn khul linh vang jur jang hơdoi, vei kơjăp tơdrong sơđơ̆ng chinh trĭ, sơđơ̆ng tơ̆ tơring tơring; jang ‘lơ̆ng tơdrong vei lăng tơmam; atŭm hăm ‘nŏh jang hơdoi hăm dôm khul linh hơlen năng tơdrong oei xa, tơdrong hrŭl măt tơ̆ tơring. Rim khei khul vei lăng kơdih tơ̆ anih jang vang vei lăng trong sơlam, jrăng sơlam. Dôm sơnăm âu ki, anih jang đei anih chĕp kơ̆l đảng, khul kơdră tơring tơchĕng tôch ‘lơ̆ng".

Hăm trong jang “Binh đoàn tơklep hăm dêh char, apŭng; công ty tơklep hăm apŭng, xăh; Khul choh jang tơklep hăm pơlei pơla; unh hnam công nhân bơngai Yoăn jang hơdoi hăm unh hnam kon kông”, dang ei Binh đoàn 15 oei bơ̆ jang tơdrong jang mŭk drăm hơdai hăm vei sơđơ̆ng tơring sơlam kơjung hlŏh 250 km tơ̆ găh Tu Tây Nguyên, tơtil hăm 2 tĕh đak Lào păng Campuchia. Dôm sơnăm âu ki, dôm anih jang hơnơ̆ng tơrĕk truh tơdrong pơtho tơdrong jang, ki thuơ̆t rong kon tơrong, pơtăm ‘long, tơgŭm hơdrĕch, tơđăh ‘long, jkon yŏng, jên jang… vă kon pơlei jang atŏk tơiung mŭk drăm lơ̆m unh hnam. Đơ̆ng noh, lơ unh hnam công nhân bơngai kon kông hlôi klăih đơ̆ng tơnuh hin, jang tŏk pơm pơdrŏng; vang tơgop kŭm hăm khul kơdră tơring pơjing tơring tơrang ‘nao tơ̆ tơring sơlam.

Thiếu tướng Hoàng Văn Sỹ, Phó bí thư Đảng, Yŏng Binh đoàn 15 ăn tơbăt, Binh đoàn dang ei đei hlŏh 15.000 ‘nu công nhân, mă lơ ‘nŏh jĭ bơngai kon kông. Sơnăm 2022, iŏk yoa jô̆ păh lăp đơ̆ng bơngai jang đei 8 triu 1 khei. Tơdrong arih xa kơ kon pơlei, bơngai jang tơ̆ tơring sơlam roi đunh roi tŏk, tơdrong jang mŭk drăm, vei sơđơ̆ng tĕh đak roi kơjăp: “Tơdrong mât mĭnh jơhngâm đon đơ̆ng dôm hơdrĕch hơdrung, ngôi pơchơt, jŏh ayŏ kơ dŏ xoang lơ̆m tơpôl roi tŏk ‘lơ̆ng; jơhngâm đon pơvei băl đơ̆ng kon pơlei, kăn ƀô̆, công nhân tơ̆ binh đoàn hơnơ̆ng kơjăp ‘lơ̆ng. Mă loi ‘nŏh jĭ kon pơlei roi hlôh vao hlŏh dơ̆ng tơdrong vei lăng groi tĕh tơ̆ tơring sơlam, tơtom chă ƀôh dôm tơdrong hlĭch, roi tơbăt hrĕnh kiơ̆ đơ̆ng noh nhôn hlôi jang hơdoi hăm tơring păng anih jang kơpal, tơtom sek tơlang dôm tơdrong krê". 

Hăm dôm trong jang trŏ ƀlep, tơdrong tơgŭm lăp hăm jơhngâm đon kon pơlei, lơ pơgar, kơ yơng ‘long cao su vang tơgop pơjing đei pơgar ‘long jing ‘lơ̆ng tơ̆ jih tơring sơlam tơ̆ găh Tu Tây Nguyên.