‘Măng akŏm Chi ƀô̆ Đảng 4, Đảng ƀô̆ Hnam trưng THPT Hoàng Hoa Thám, apŭng Lệ Thủy, dêh char Quảng Bình noh kăp gĭt tơpă. Pơih blŭng ăn hop akŏm, rim Đảng viên tơroi kơ dôm tơdrong găh Ƀok Hô.

Khei năr âu ki, lơ̆m dôm ‘măng akŏm Đảng kiơ̆ sơkơ̆t, rim Chi ƀô̆ tơ̆ Đảng ƀô̆ trưng THPT Hoàng Hoa Thám hlôi tơroi kơ dôm tơdrong găh Ƀok Hô vă hŏk pơhrăm păng jang kiơ̆. Lơ̆m noh, tơƀôh hơdăh dôm tơdrong oei tơjruh, tam mă lăp lơ̆m kăn ƀô̆, đảng viên vă tơlĕch trong chă hơmet pơ ‘lơ̆ng dăh mă tơroi kơ bơngai ‘lơ̆ng, tơdrong jang ‘lơ̆ng. Kô pơtho Nguyễn Thị Thương, Chi ƀô̆ 4, Đảng ƀô̆ Trưng THPT Hoàng Hoa Thám, apŭng Lệ Thủy ăn tơbăt, adrol kơ akŏm, rim đảng viên hơmet dôm tơdrong tơroi kăp gĭt kơ Ƀok Hô, tơroi hăm đảng viên lơ̆m chi ƀô̆. Noh jing dôm tơdrong tơroi "Đak tŏ đak hơngeo", "Khei năr kăp gĭt tơpă", "Pơnhan chao klăh asong 3", "Ao tơnŏ", “Tơpang ti”.... Đơ̆ng mă tơlĕch tơdrong mă âu, rim ‘măng akŏm chi ƀô̆ adoi tơnăp hloh:   “Adrol kơ rim ‘măng akŏm Chi ƀô̆, nhôn tơchă dôm kơsâ̆p săch ‘lơ̆ng, tơdrong tơroi hơ-iă găh tơdrong hŏk pơhrăm păng jang kiơ̆ đon ‘lơ̆ng Hồ Chí Minh. Kiơ̆ đơ̆ng dôm tơdrong tơroi âu nhôn băt hơdăh ƀai hŏk ăn kơdih rim đảng viên, ăn Chi ƀô̆ păng hăm Đảng ƀô̆ hloi. Adoi đơ̆ng noh băt hơdăh dôm ƀai hŏk đơ̆ng tơdrong hơrih, tơpôl truh tơdrong jang”

Đang ƀô̆ thĭ trâ̆n Anih mir đak lar Lệ Ninh, apŭng Lệ Thủy, dêh char Quảng Bình đei jê̆ 500 đảng viên akŏm tơ̆ 12 Chi ƀô̆. Rim khei, Kâ̆p wi pơgơ̆r 1 năr akŏm pơma đam, rơih dôm tơdrong tơroi ‘lơ̆ng, kăp gĭt kơ Ƀok Hô vă tơroi ăn đe đảng viên atŭm tơmơ̆ng ăh pơtơm akŏm chi ƀô̆ rim khei. Ƀok Nguyễn Thanh Hải, Ƀĭ thư Chi ƀô̆ Kueng kơphô̆ Liên Cư, thĭ trâ̆n Anih mir đak lar Lệ Ninh, apŭng Lệ Thủy, dêh char Quảng Bình ăn tơbăt, tơdrong gĭt kơ chi ƀô̆ noh lơ đảng viên juăt jang chŭn mir, noh tơdrong tơroi tơbăt pơm kiơ̆ Tơchơ̆t kơsô̆ 05 đơ̆ng Anih tơm Chĭnh trĭ athei ƀônh vao, tơpă tơgŭm ăn đảng viên gơh iŏk yua lơ̆m tơdrong hơrih, pơm jang. ‘Măng akŏm ‘nao âu hloh, đei minh ƀar đảng viên truh akŏm klui, pơm ưh kơ ‘lơ̆ng truh tơdrong akŏm chi ƀô̆. Ƀơ̆t âu, ƀok Nguyễn Thanh Hải, Ƀĭ thư Chi ƀô̆ hlôi tơroi tơdrong gĭt kơ Ƀok Hô: “Khei năr kăp gĭt tơpă - 10 pơnĭt adoi klui bơih”. Kiơ̆ đơ̆ng tơdrong tơroi âu, kâ̆p wi ‘meh vă đe đảng viên kơdih hơlen lăng po, băt tơgĭt kơ jơ ‘năr kơdih, jơnŭm jang păng băt lăng tơgĭt kơ jơ ‘năr bơngai nai: “Đảng viên pơm kiơ̆ rim khei, rim jăl, rim sơnăm păng ăh jê̆ tôch sơnăm jang atŭm păng sơkơ̆t hơdăh tơdrong jang đe đảng viên. ‘Meh jang tơnăp lơ̆m tơdrong tơroi kơ Ƀok păng vă pơlan să lơ̆m tơdrong hơrih, lơ̆m kon pơlei noh blŭng a nhôn akŏm pơma dơnuh lơ̆m chi ƀô̆, rơih lơ tơdrong tơroi ‘lơ̆ng kơ Ƀok, găh dôm bơngai jang rơgei vă hŏk pơhrăm păng jang kiơ̆, lơ̆m noh adoi akŏm tơƀôh hơdăh dôm tơdrong ưh kơ ‘lơ̆ng lơ̆m kăn ƀô̆, đảng viên. Nhôn tơchơ̆t noh jang đơ̆ng tơdrong iĕ hloh, tơmơ̆t lơ̆m tơdrong hơrih trong jang đơ̆ng đảng viên, hlôh vao hơdăh đơ̆ng tơdrong tơroi iĕ ioch”

Đảng ƀô̆ apŭng Lệ Thủy, dêh char Quảng Bình đei 38 Đang ƀô̆ păng 19 Chi ƀô̆ jang hadoi hăm 11.800 đảng viên. Pơm kiơ̆ Tơchơ̆t kơsô̆ 05 găh hơtŏk pran hŏk pơhrăm păng jang kiơ̆ đon bơnôh trong jang ‘lơ̆ng Hồ Chí Minh, truh dang ei, 100% Chi ƀô̆ đảng lơ̆m tơring tơlĕch chă tơroi tơdrong ‘lơ̆ng đơ̆ng Ƀok, bơngai jang ‘lơ̆ng lơ̆m dôm ‘măng akŏm chi ƀô̆.

Ƀok Lê Vĩnh Thế, Ƀĭ thư Huyên uy Lệ Thủy, dêh char Quảng Bình ăn tơbăt, tơroi kơ Ƀok Hô hlôi pơm tơplih ‘nao tơdrong akŏm păng hơtŏk ‘lơ̆ng tơdrong akŏm Chi ƀô̆ tơ̆ tơring, đơ̆ng noh pơm tơplih đon kơchĕng kơ rim kăn ƀô̆, đảng viên păng kon pơlei. Dôm tơdrong tơroi kơ Ƀok kĕ chă pơlan să pran kơtang, vă đảng viên, kon pơlei hŏk ƀoi, sơkơ̆t hơdăh sơnong jang po lơ̆m tơdrong pơ ‘lơ̆ng đon bơnôh lơ̆m tơdrong hơrih:  “Nhôn hơnhăk tơdrong hŏk pơhrăm, jang kiơ̆ đon bơnôh trong jang ‘lơ̆ng Hồ Chí Minh lơ̆m dôm Tơchơ̆t kơ Hop akŏm Đảng dôm jăl păng tơdrong pơm jang tơguăt hăm sơnong jang chĭnh trĭ tơ̆ tơring nhen lơ̆m: Xut pơngot tơjur hin dơnuh, tơdrong iŏk teh vă pơm jang tơdrong kăl, pơjing tơring tơrang ‘nao. Lệ Thủy adoi pơjing 5 tơchơ̆t tơm tơguăt hăm đon tơchĕng, đon bơnôh Hồ Chí Minh, hơnhăk truh dôm đang ƀô̆, chi ƀô̆ jang hơdăh ăn rim đảng viên. Hơnơ̆ng tơguăt tơdrong âu hăm sơnong yuk hơlâu kơ bơngai jang kơpal, đảng viên yuk trong hơlâu hăm tơchơ̆t đảng viên yak hơlâu, kon pơlei kiơ̆ đơ̆ng rŏng vă iŏk yua jơhngơ̆m pran atŭm đơ̆ng kon pơlei lơ̆m tơring”