Hlŏh dôm jĭt sơnăm âu ki, yă Ka Joen, tơ̆ xăh Liêng Srônh, apŭng Đam Rông (Lâm Đồng) ƀôh lơ ‘măng đe pơm hơmet trong gre 27 kơdâu brih hnam sư. Trong ‘nao pơm đang 2,3 khei ‘nŏh pơchăh dơ̆ng, kơna đei lơ anih pŭng lŭng. Tơdrong ‘nâu đei hơlơ̆k hơle hơnơ̆ng pơm ăn tơdrong yak vih vât, tơdrong arih xa đơ̆ng kon pơlei lơ̆m tơring jing đei lơ tơdrong ưh kơ ‘lơ̆ng: “Năr ‘mi ‘nŏh ƀlông ƀlang đak lŏk tơ̆ng, đak lơ̆p nhen thoi sơlŭng đak, ưh đei bu chă yak vih vât. Oei pơyan phang ‘nŏh ‘nhui ƀruih kơŭl kơăl”.

Lơ jăl trong tơ̆ trong gre 27 kŭm đei thoi nŏh ‘năi. Măt trong hơnơ̆ng đei pơm hơmet ming mă lei kŭm tôch ƀônh hư pơchăh 'năi kơ na chă yak vih vât tôch pơmat tat. Ƀok Đoàn Văn Vĩnh, tơ̆ xăh Đạ Rsal, apŭng Đam Rông (Lâm Đồng) pơma: “Lơ trong pơm đang ‘nŏh hư dơ̆ng. Ƀât ‘mi gre tih kơdâu klĕch ‘nŏh đak tơprăh đĭ, bơngai hao gre vih vât ưh hơđơ̆ng ti ‘nŏh puh ƀơm tơ̆ pơnang. Tơ̆ kơmăng đe tơdăm hao gre kư̆ kă, kơdâu veh kơ gre tih, veh kơ pŭng lŭng jing đei lơ 'măng pơ̆k gre, gre tâm prĕh băl”.

Trong gre 27 jĭ trong tơm tơƀưh 2 dêh char Lâm Đồng păng Đắk Lắk, trong kơjung hlŏh 200km, đei tơlĕch jên pơm kiơ̆ jăl păng tơmât yoa lơ̆m sơnăm 1998. Kiơ̆ ƀok Nguyễn Văn Gia, Kơdră Anih vei lăng trong nơnăm dêh char Lâm Đồng, jên vă pơm hơmet trong ‘nâu yoa Anih tơm vei lăng trong nơnăm ƀơk, hăm kơsô̆ jên pơm hơmet kiơ̆ khei hơgăt đơ̆ng 40 truh 50 ti 1 sơnăm lăp măh ăn dêh char pơm hơmet đơ̆ng 8 truh 10km 1 sơnăm. Đơ̆ng tơdrong pơm hơmet lơ ƀôt, iơ iĕ âu kơna trong jing hư hơnơ̆ng, roi đunh roi kơnê̆.

“Hăm kơsô̆ jên đei tơlĕch thoi nŏh tơpă mơ̆n ưh gơ̆h pơm lăp hăm tơdrong ‘mĕh vă, jing đei tơdrong jăl trong ‘nâu hơmet đang ‘nŏh jăl trong ƀât to hư dơ̆ng. Dêh char hlôi tơlĕch nơ̆r pơma đunh bơih, păng lơ̆m sơnăm 2010 ‘nŏh Anih tơm vei lăng trong nơnăm tơchơ̆t kĭ ăn tơdrong tơmât jên jang pơm hơmet trong gre ‘nâu hăm kơsô̆ jên dang 1.400 ti. Mă lei, đơ̆ng noh truh dang ei, dêh char hơnơ̆ng tơlĕch nơ̆r pơma kiơ̆ lơ kênh, Anih tơm vei lăng trong nơnăm kŭm đei nơ̆l tơl tôch lơ akhan, tam mă chă đei jên vă tơlĕch ăn tơdrong jang pơm trong gre 'nâu”.

Anih vei lăng kon pơlei dêh char Lâm Đồng tơchă lơ trong jang, lơ̆m nŏh apinh pơchoh trong jang rơhơi hiôk ƀiơ̆ vă Lâm Đồng gơ̆h tơlĕch jên kơdih pơm hơdrol. Mă lei, kiơ̆ ƀok Phạm S, Phŏ Kơdră vei lăng kon pơlei dêh char Lâm Đồng, yoa tơdrong ‘nâu đơ̆ng sơ̆ tam mă biơh đei kơna vă bơ̆ jang tôch pơmat.

“Trong gre 27 păih dêh char Lâm Đồng jĭ trong kơnê̆ hlŏh lơ̆m 128 tŏ trong tĕh đak Việt Nam mă 14 sơnăm âu ki tam mă đei tơlĕch jên pơm hơmet. ‘Nao âu Phŏ Thủ tướng Trần Lưu Quang mât ‘nŏh Kơdră vei lăng kon pơlei dêh char Lâm Đồng kŭm pơma mơ̆n nơ̆r apinh, păng nơ̆r apinh âu nhôn ƀôh tôch tơgăl. Ƀât mă jên oei ưh kơmăh vă klăih song ăn dôm tơdrong jang tơm kơ tĕh đak ‘nŏh kăl đei tơdrong drơ̆ng nơ̆r đơ̆ng Phó Thủ tướng chu pơjao ăn Anih tơm vei lăng trong nơnăm ‘mơ̆i. Anih tơm vei lăng trong nơnăm gô đei hla ar chih, ưh đei mong akŏm đei jên păng athei Lâm Đồng chă jên hơdrol vă bơ̆ jang. Mă lei ‘nâu jĭ tơdrong đơ̆ng sơ̆ tam mă biơh đei yoa thoi nŏh mă đơ̆ng đĭ tơlĕch nơ̆r apinh bơih ră mă lei ưh jor gô tôch pơmat tat”.

Dang ei 1 sơnăm, jên tĕh đak tơlĕch lơ ti vă bơ̆ jang pơm hơmet, vei lăng trong gre 27 jăl kơdâu klĕch dêh char Lâm Đồng mă lei oei hơnơ̆ng kơ hư, trong roi đunh roi kơnê̆. Tơdrong ‘nâu pơm tơlĕch lơ tơdrong pơmat tat mưh chă yak vih vât, ƀơm kơnê̆ truh tơdrong jang atŏk tơiung mŭk drăm, tơpôl Lâm Đồng păng tơring Tây Nguyên.