Ƀok Phạm Ngọc Nghị, Kơdră Anih vei lăng kon pơlei dêh char Dak Lak tơbăt, ƀơ̆t tơdrong jang ưh kơ măh jên pơm, dêh char hlôi apĭnh hơmet ming akŏp kơ sô̆ jên tơmơ̆t jang đơ̆ng 1.509 ti hlak jên tŏk 1.841 ti hlak jên, tŏk dơ̆ng 332 ti hlak jên. Kơsô̆ jên âu vei sơđơ̆ng ăn tơdrong jang iŏk teh đĭ trong, mă lei truh dang ei tơdrong jang âu oei tôch kơ hiơ̆. Tơdrong ‘nâu ăn ƀôh, dôm anih jang tam mă jang đĭ hơnăp jang.

Kơdră Anih vei lăng kon pơlei dêh char Dak Lak athei dôm anih jang ƀơm truh athei hơdrin, kơchăng bơ̆jang kiơ̆ dôm hơnăp jang đơ̆ng kơdih. Lơ̆m noh, bơngai chĕp kơ̆l athei hơtŏk loi dơ̆ng hơnăp jang, athei bơngai tơ̆ hơla jang mă tơnăp. Mă loi ‘noh jĭ tơdrong jang iŏk teh, dang ei tŏk bŏk tơ hlăk păng hiơ̆, kăl athei đei tơdrong mơ̆t jang kơtang hloh dơ̆ng mă gơh vei sơđơ̆ng jang hrĕnh kiơ̆ trong tơlĕch jang.