Lơ̆m khei 7, khei 8 rim sơnăm, đei dôm năr ‘mi hơnơ̆ng vă jê̆ 20 năr, mă đơ̆ng ưh kơ đei đak lơ̆p ră mă lei trong nơnăm nhen đei pơ ‘ngơ̆m đak hơnhăk truh hơmơt kơ hư răm ưh kơ sơđơ̆ng.

Lơ̆m pơyan ‘mi đak tih sơnăm ‘nâu, anih jang găh trong nơnăm Đắk Nông hlôi kơchăng hơmet tôm dôm trong jang tang găn ‘mi kial pơrăm hăm trong jang kăl “4 kơtă anih”, hơdai hăm ‘noh jang hơdai hăm khŭl kơdră rim tơring roi tơbăt lê̆ hơdrol, dăr hơlen tơdrong ƀŭ klơ̆p tơhnă rim jăl trong, mă loi ‘noh jĭ hơnih đak ro vă tang găn hơmơt kơ đak lơ̆p, teh hơlih. Ƀok Hà Sỹ Sơn, Phŏ Kơdră Anih vei lăng găh trong nơnăm gre kơdâu dêh char Đắk Nông tơbăt, dang ei rim khŭl lĭnh athei hơnơ̆ng dăr joang hơlen lăng trong, tơtom chă ƀôh, hơmet ‘lơ̆ng dôm tơdrong đei ƀôh vă vei sơđơ̆ng trong nơnăm yak vih vơ̆t hiôk.