Tơ̆ xăh Ia Chía, apŭng Ia Grai, dêh char Gia Lai, Trung ương Đoàn hlôi pơjao 350 tơpu tơmam ăn dôm unh hnam ‘nŏh jĭ công nhân bơngai jang tơƀâp pơmat tat, đe hơiŏh jĭ bơngai kon kông adrin hŏk pơhrăm... 1 tơpu tơmam đei kơjă 700.000 hlak jên, đei hloi jên păng dôm tơmam yoa kăl. Kiơ̆ đơ̆ng tơdrong jang “Têt ‘mêm mơnat, sơnăm Prao ‘lơ̆ng hơiă”, Trung ương Đoàn hơpơi ‘mĕh tưk tơiung jơhngâm đon ‘mêm mơnat, “tơgum băl”, mât 1 ƀơ̆r đon, pring vei băl đơ̆ng rim hơdrĕch hơdrung. Dôm anih jang đoan hơnơ̆ng bơ̆ jang, đei dơ̆ng lơ tơdrong jang gĭt kăl, yak hơdai hăm đe hơioh đei tơdrong arih xa pơmat tat, mă loi ƀât Tết Nguyên đán, tơgop pơjing jơhngâm pran vă đe bôl boăl druh dăm, đoàn viên, bơngai jang hơnơ̆ng adrin jang xa.

Iŏk đei tơmam tơgŭm đơ̆ng tơdrong jang, ‘nhŏng Rơ Mah Ky, tơ̆ plei Kon Yố, xăh Ia Chía, pơma: “Tôch bơnê kơ anih jang tơrek truh, hơpăh ăn tơmam, tôch gĭt kăl kơ tơring, hơpơi ‘mĕh iŏk đei tơdrong tơrek hlŏh dơ̆ng đơ̆ng rim anih jang kơpal hăm xăh hơtăih yăih, tơring pơmat tat dêh hlŏh tơ̆ apŭng”

Ƀlep ƀât ‘măng mă âu, khul jang đơ̆ng Trung ương Đoàn TNCS Hồ Chí Minh kŭm anih jang đoan dêh char Gia Lai hlôi năm ngôi, pơlung đe linh vei lăng tơring sơlam tơ̆ Kơđông Ia Chía, dêh char Gia Lai. Gia Lai jĭ tơring mă 13 lơ̆m kơsô̆ 25 dêh char, plt mă tơdrong jang “Têt ‘mêm mơnat, Sơnăm Prao ’lơ̆ng hơiă" đei pơgơ̆r hăm hlŏh 10.400 tơpu tơmam Tết vă pơjao ăn dôm công nhân bơngai jang đei măt lơ̆m dôm bơngai đei puh tơlĕch đơ̆ng anih jang yoa ƀơm kơnê̆ đơ̆ng jĭ hơbuh sơ̆, dôm kon pơlei jang ka tơƀâp lơ tơdrong nol yoa đơ̆ng tŏ ‘mi kial tơplih păng đe ƀô̆ đô̆i vei lăng tơring sơlam.

Lơ̆m giĕng âu ki mơ̆n, Trung ương Đoàn TNCS Hồ Chí Minh jang hơdoi hăm Anih jang đoan dêh char Kon Tum pơgơ̆r “Pơyan Puih mak tơ̆ tơring sơlam - Têt tơ̆ achon kông đak dơsĭ” ƀlep ƀât Tết Giáp Thìn 2024 tơ̆ 2 apŭng sơlam Ia H’Drai păng Sa Thầy.

Tơ̆ apŭng sơlam Ia H’Drai, dêh char Kon Tum, Ban Bí thư Trung ương Đoàn TNCS Hồ Chí Minh pơjao trong jang xa đei kơjă 2 ti hlak, jên jang vă đe đoàn viên, druh dăm tơ̆ tơring atŏk tơiung mŭk drăm; hơpăh 20 kơ suơ̆t jên hŏk ƀŏng, 1 kơsuơ̆t đei kơjă 2 triu hlak jên ăn đe ŏh hŏk tro tơnuh hŏk rơgei; hơpăh 30 tơpu tơmam ăn công nhân Công ty TNHH MTV Cao su Chư Mo Ray păng Công ty jang Cao su Sa Thầy. 

‘Nhŏng Ngô Văn Cương, Bí thư Trung ương Đoàn, Kơdră Anih Dăr hơlen kơ Trung ương Đoàn, ăn tơbăt: “Kiơ̆ đơ̆ng dôm tơdrong jang ‘nâu vă tơgŭm ăn bơngai jang, druh dăm công nhân, bơngai đei tơdrong arih xa pơmat tat đei tơdrong ‘lơ̆ng gơh vih tơ̆ pơlei xa Tết phĭ tơtŏ dơnŏ ‘lơ̆ng, unh hnam roi chơt ƀiơ̆. Đơ̆ng rŏng kơ Tết ‘nŏh đei dơ̆ng jơhngâm hưch hanh vă tơgŭm ăn bơngai jang kŭm nhen đe druh dăm công nhân păng druh dăm đei tơdrong arih xa pơmat tat bơ̆ jang ‘lơ̆ng ƀiơ̆ mưh đĭ đei 1 pơyan Tết chơt hơiă bơih”.

Tơ̆ năr pơgơ̆r “Pơyan puih mak tơring sơlam - Têt tơ̆ achon kông đak dơsĭ” hơdai hăm hơmet têt ăn đe druh dăm công nhân, bơngai jang đei pơgơ̆r tơ̆ xăh Mô Rai, apŭng Sa Thầy, Ban Bí thư Trung ương Đoàn TNCS Hồ Chí Minh hơpăh 20 tơpu tơmam ăn bơngai đei grih, đei kon pơlei lui yom tơ̆ tơring kon kông; hơpăh 2 tŏ kơmăy vi tính, aloa ăn Đoàn xăh Mô Rai. Ƀlep ƀât Tết so kơ hơdrĕch hơdrung, Ban Bí thư Trung ương Đoàn TNCS Hồ Chí Minh kŭm hăm Anih jang đoàn dêh char Kon Tum oei năm ngôi, hmach thơ thou Tết pơlung jơhngâm, hơpăh tơmam ăn đe kăn ƀô̆, linh Công an xăh Ia Dom păng kơđông linh Ia Dom, apŭng Ia H’Drai.

Pơma tơ̆ âu, Bí thư Trung ương Đoàn Ngô Văn Cương ăn tơbăt, tơdrong pơgơ̆r "Pơyan puih mak tơring sơlam – Têt tơ̆ achon kông đak dơsĭ" ‘nŏh jĭ tơdrong jang hơnơ̆ng rim sơnăm đei Ban Bí thư Trung ương Đoàn pơgơ̆r ƀât vă jê̆ truh Tết Nguyên đán. Tơdrong ‘nâu vă roi tơbăt, pơtho tơƀôh, pơhlôh đon ăn đe đoàn viên, druh dăm, hơiŏh iĕ găh tơdrong gĭt kăl đơ̆ng tơring sơlam lơ̆m tơdrong jang atŏk tơiung mŭk drăm, tơpôl, vei sơđơ̆ng tơring sơlam teh đak; atŏk tơiung jơhngâm đon ‘mêm mơnat, tơgŭm băl, vei lăng năng tông, tơgŭm ăn đe đoàn viên, druh dăm, kon pơlei đei tơdrong arih xa pơmat tat ƀlep ƀât Tết Nguyên đán. ‘Nhŏng Ngô Văn Cương oei athei Khul kơdră chĕp kơ̆l Anih jang đoan dêh char Kon Tum pơtho ăn rim khul jang đoan lơ̆m dêh char hơnơ̆ng roi tơƀôh găh tơdỏng jang ‘nâu vă pôk pơ ư dôm tơdrong kăp gĭt, ‘lơ̆ng hơiă lơ̆m dôm năr hơtuch sơnăm, hơmet tôm tơdrong vă sơng xa têt.