Ƀok Võ Văn Thưởng ‘noh kang ƀô̆ chĕp pơgơ̆r tơm dơnơm kơ Đảng păng Teh đak, đei hŏk pơhrăm tôm tong, atŏk tơ iung đơ̆ng tơring, đei pơjao iŏk jang lơ kơchư̆k jang kăl kơ Đảng păng Teh đak. Mă lei, au ki kiơ̆ hla bơar chih tơbăt đơ̆ng Hơnih bơ̆ jang dăr lăng Trung ương păng rim hơnih bơ̆ jang, Ƀok hlôi pơm glăi Tơdrong tơchơ̆t găh dôm tơdrong đảng viên ưh kơ gơ̆h pơm, Tơdrong tơchơ̆t găh hơnăp jang pơm jŭk yŭk trong ‘lơ̆ng kơ kang ƀô̆, đang viên, mă kăl ‘noh Kơdră jang lơ̆m Hơnih tơm Chinh trĭ, kơdră jang lơ̆m Ban Bí thư, Kơdră jang lơ̆m Khul kơdră chĕp pơgơ̆r Trung ương Đảng păng hơnăp jang bơngai chĕp kơ̆l kiơ̆ rim tơdrong tơchơ̆t đơ̆ng Đảng păng Khôi luơ̆t Teh đak.

Dôm tơdrong pơm glăi kơ ƀok Võ Văn Thưởng hlôi pơm kơnê̆ truh măt lăng tơpôl, pơm kơnê̆ truh tơdrong đei yom kơ Đảng, Teh đak păng kơ dih ƀok. Ƀôh hơdăh chiu pŭ tơ̆ hơnăp Đảng, Teh đak păng Kon pơlei, ƀok hlôi chih hla bơar apĭnh pơdơ̆h iŏk jang rim kơchư̆k đei pơjao păng pơdơ̆h bơ̆ jang hloi. ‘Moi kiơ̆ rim tơdrong tơchơ̆t đơ̆ng Đảng, Teh đak păng lăng hơlen kiơ̆ jơhngơ̆m đon ‘meh vă đơ̆ng ƀok Võ Văn Thưởng, Khul kơdră chĕp pơgơ̆r Trung ương Đảng drơ̆ng nơ̆r ăn ƀok Võ Văn Thưởng pơdơ̆h jang rim kơchư̆k: Kơdră jang lơ̆m Hơnih tơm Chinh trĭ, Kơdră jang lơ̆m Khul kơdră chĕp pơgơ̆r Trung ương Đảng jăl XIII, Kơdră chĕp pơgơ̆r Teh đak Cộng hoà xã hội chủ nghĩa Việt Nam, Kơdră chĕp pơgơ̆r Jơnŭm vei lăng teh đak păng Sơđơ̆ng jăl jang 2021-2026.