Tết truh, tơ̆ kông, rim unh hnam ngôi hơdai, sŏng xa, et ngôi tơdrô kŭm hăm lơ nơ̆r hmach thơ thou ăn băl 1 sơnăm ‘nao đei ƀĕnh tơdrong pŭn ai. Oei tơ̆ dôm kơ đông linh lơ̆m achon kông Trường Sa, kăn ƀô̆, linh mât hơdai lơ̆m tơdrong chơt hơiă kơ pơam Puih mak, ha ƀơ̆r hơri dôm ƀai hơiă kơ sơnăm ‘nao Giáp Thìn 2024.

Tết tơ̆ Trường Sa ưh đei hơlăk, ƀier, ưh đei hât, ưh đei prăh kơmlăi pơkao mă lei oei tôch kơchơt păng ƀĕnh jơhngâm đon ‘mêm băl đơ̆ng bôl boăl, đơ̆ng linh hăm kon pơlei. Tơdrong đei gô chang dêh hlŏh lơ̆m gơmăng sơng sơnăm ‘nao tơ̆ tơring achon kông đak dơsĭ ‘nŏh jĭ tơdrong hơri hơxoang đơ̆ng đe kăn ƀô̆, linh păng kon pơlei. Lơ̆m hnam hôp ƀĕnh tơdrong chơt hơiă, rim bơngai vang hơdoi, mât 1 ƀơ̆r đon, tơƀôh hơdăh đon pơhnŏng vei kơjăp achon kông đak dơsĭ gĭt kăl kơ teh đak.

Trung Tá Đặng Văn Tài, Phŏ jang Chính trị tơ̆ achon Song Tử Tây tơroi: Sơnăm ‘nâu jĭ sơnăm mă 2 ‘nhŏng xa têt tơ̆ achon kông au. Mă đơ̆ng hơtăih kơ hnam, mă lei ‘măng sơng têt hơ yơ tơ̆ achon kông âu kŭm tôch ‘čhôk ‘nă hăm lơ tơdrong ưh đei hiơt: “Tết tơ̆ kông lơ̆m đak dơsĭ kŭm iŏk đei ƀĕnh jơhngâm đon ‘mêm kơeng đơ̆ng groi kông gơih ăn, đei quất, đào, đei ƀĕng chưng. ‘Nâu jĭ jơhngâm đon đơ̆ng kon pơlei, đơ̆ng kon hơ ‘lơ̆p, đơ̆ng unh hnam tơ̆ kông pơtruh ăn đe linh tơ̆ achon đak dơsĭ. ‘Nâu jĭ tơdrong pơvei tôch kơjăp vă pơlung kăn ƀô̆, linh tơ̆ đak dơsĭ chĕp kơjăp phao, vei lăng ‘lơ̆ng tơdrong pơm tơm achon kông, đak dơsĭ gĭt kăl kơ teh đak.”

Hăm đe linh mơlôh ‘măng mă blŭng xa Tết hơtăih kơ hnam, tơpă mơ̆n ‘nâu jĭ tơdrong ưh kơ đei lai yơ hiơt. Rok trong chĕp ba mưh năm tơ̆ achon kông đơ̆ng rim ‘nu ‘linh ‘nŏh jĭ um rup pơlei pơla, mĕ ƀă, kơtum kơtŏng ‘nhŏng oh. ‘Noh jĭ tơdrong tưk tơiung dơ̆ng jơhngâm pran tơgŭm ăn đe linh adrin đĭ jơhngâm mưh bơ̆ jang tơ̆ tơring đak dơsĭ hơtăih yăih.

Linh Hà Quang Huy (plei tơ̆ Khánh Hòa) tơroi: ‘Măng mă blŭng xa Tết tơ̆ tơring achon đak dơsĭ tơ̆ jih kơ teh đak đei ƀĕnh tơdrong tôch hơiă. Mă lei sơnăm mơlôh athei pơtâp pơhrăm, păng Huy tôch kơ čhôk ‘nă găh tơdrong ‘nŏh: “Kŭm rơnguơ̆ koh, mă lei yoa tơdrong jang kơna athei bơ̆ jang mă kĕh ‘mơ̆i. Inh ‘mĕh pơtruh nơ̆r ăn kơ mĕ ƀă păng bôl boăl tơ̆ hnam, ‘nŏh mĕ bă lê̆ pơngơ̆t kiơ yoa tơ̆ âu đei đe ƀok yŏng kŭm hăm bôl boăl hơnơ̆ng tơgŭm ăn inh lơ tơdrong. Inh ‘mĕh tơ̆ hnam mĕ ƀă sơđơ̆ng jơhngâm đơ̆ng rŏng 2 sơnăm pơm linh, jang ‘lơ̆ng tơdrong jang đơ̆ng khul linh ‘nŏh inh vih dơ̆ng hăm mĕ ƀă.”

Oei linh Nguyễn Hữu Em, pơlei tơ̆ Khánh Hòa ‘nŏh tơroi mă đơ̆ng hơtăih kơ hnam, rơnguơ̆ kơ mĕ ƀă ‘nhŏng oh mă lei Têt tơ̆ âu đei lơ tơdrong tôch hơiă, gô ƀlŏk ling lang lơ̆m jơhnơr arih kơdih: “Kơplăh dang ei inh ƀôh kŭm sơ ‘ngon mơ̆n mă lei đei ‘nhŏng oh ngôi hơdai kŭm da ƀiơ̆ sơ ‘ngon ƀiơ̆ mưh xa têt hơtăih kơ hnam. Kŭm hăm ‘nhŏng oh pơm ƀĕng chưng, pơm têt, hlôt pơkao. Adrol ki tơ̆ hnam đei bơngai lơ̆m hnam hơmet ngăl, ba ưh đei pơm kiơ mă lei dang ei tơ̆ âu ba pơm hăm ‘nhŏng oh tôch kơ chơt. Kon hmach thơ thou kơ mĕ ƀă pran jăng grang hơkâu, tơdăh rơnguơ̆ kơ kon ‘nŏh lê̆ kơ pơngơ̆t kiơ, tơ̆ âu xa têt hăm ‘nhŏng oh kŭm tôch chơt, mĕ ƀă kŭm lê̆ pơngơ̆t yă kiơ ăn kon. Hmach thơ thou ăn mĕ ƀă xa têt chơt hơiă ‘nă hal, sơng 1 sơnăm ‘nao đei ƀĕnh tơdrong hiôk chơt.”

‘Nhŏng Cao Văn Giáp, Phŏ Kơdră vei lăng kon pơlei xă achon kông Song Tử Tây ăn tơbăt: khul linh păng kon pơlei tơ̆ âu hơnơ̆ng "sơng" Tết hrôih, mưh dôm ƀato chơ ba ƀĕnh jơhngâm đon ‘mêm kơ eng đơ̆ng kông nhen bơ̆n hla prit, hla ƀum kiĕng, phe tơyông, pơkao đào, pơkao mai păng kơ kơchŏu tơm quất tôch ‘lơ̆ng... Oei gơmăng sơng sơnăm ‘nao, tơ̆ achon kông kŭm tôch chơt, khul linh hăm kon pơlei ngôi pơchơt, pơma nuh tôch hơiă, hmach thơ thou ăn băl 1 sơnăm ‘nao liĕm kâu, jang đei lơ tơdrong:

“Tơ̆ âu đe ‘nhŏng ƀô đô̆i hăm kon pơlei jĭ kơtum kơtŏng ‘nhŏng oh inh ‘năi păng inh jĭ ‘nhŏng oh đe sư ‘năi. Tơdrong sơng xa Têt kŭm nhen tơ̆ jơ̆p tơring lơ̆m teh đak, ưh kơ đei thĭu yă kiơ, đe ƀĕng chưng, pơkao mai, pơkao đào. Tơ̆ hnam sơng sơnăm ‘nao hơdai hăm băl, tơ̆ âu nhôn kŭm năm ngôi, hmach thơ thou têt ăn dôm anih jang, khul linh, rôp ti, pơlung băl adrin. Ƀât lăp dêh hnang chơt măh nhâm hơdai, akhan rơnguơ̆ kơ mĕ ƀă.”

Unh hnam, mĕ ƀă, kon kăn, ‘nhŏng oh ling lang jĭ khul bơngai tơgŭm tôch kơjăp tơ̆ găh rŏng. Hăm đe linh hle kŭm thoi noh păng hăm đe si kuan đĭ bơ̆ jang dôm jĭt sơnăm lơ̆m khul linh kŭm thoi noh mơ̆n. Thượng Tá Nguyễn Văn Khương, Kơdră jang Chính trị tơ̆ achon kông Song Tử Tây hưch hanh akhan: Pơlei pơla ling lang jĭ anih gơnang yoa  tôch kơjăp vă rim bơngai linh tơ̆ achon kông hue lăng truh: “‘Ngoăih kơ nơ̆r hmach thơ thou Tết, ‘ngoăih kơ tơmam drăm ‘nŏh oei đei tơmam tôch kăp gĭt jĭ kơthơ chih ti đơ̆ng inh gơih ăn kon kăn vă mưh đŏk kơthơ ‘nŏh nhen thoi oei xa têt hăm klo tơ̆ achon kông đak dơsĭ, ƀât mă bơngai ƀă oei xa Têt hơtăih kơ hnam, gơ̆h ƀôh ƀĕnh jơhngâm đon ‘mêm kơ eng đơ̆ng ƀă.”

‘Nhŏng Khương kŭm nhen bôl boăl sư băt, jơhngâm đon rim ‘nu linh hơnơ̆ng ƀlŏk truh kơ unh hnam, rơnguơ̆ kơ kon kăn, rơnguơ̆ kơ pơlei pơla mă lei đĭ đăng athei yoa Tơdrong jang vei lăng teh đak. Kơlih yoa teh đak lơ̆m rim plei nuih bơngai Việt jĭ unh hnam, jĭ mĕ ƀă, jĭ kơdih kâu bơ̆n. Kơna, Tết hăm đe linh tơ̆ tơring achon kông đak dơsĭ hơtăih yăih ‘nŏh jĭ  tơdrong hưch hanh, tơdrong čhhôk ‘nă mưh ti chĕp kơjăp phao vei lăng ‘lơ̆ng tơdrong rơngei ăn tơring đak dơsĭ, rơvơ̆ng plenh kơ teh đak, pơm ăn Pơyan Puih mak tơ̆ pơlei pơla Việt Nam gơ̆h hiôk chơt ling lang./.