Sơnăm 2023, Kŏng ti tơm Tân cảng Sài Gòn, anih mơdro sa khŭl lĭnh găh khŭl lĭnh đak dơsĭ jang hơdai hăm Khŭl tơroi tơbăt Anih jang đảng 3 dêh char Kon Tum, Gia Lai păng Đăk Nông tŭn pran tơroi tơbăt găh đak dơsĭ, achon đak dơsĭ lơ̆m rim răih kon pơlei. Tơ̆ dôm jơ tơroi tơbăt ăn kơ hloh 4.000 ‘nu tôm tơdrong kơtơ̆ng ang găh đak dơsĭ, achon đak dơsĭ. Vang jang tơdrong jang ƀlŏk bơnê păng vei sơđơ̆ng tơdrong arih sa tơpôl, anih jang hlôi man 15 tŏ hnam ‘mêm mơnat; Iŏk rong ‘me, vei lăng 28 ‘nu mĕ Việt Nam nuih mơng, ŭnh hnam lĭnh lôch dŏng teh đak; Pơjao asong tơmam ăn ŭnh hnam dơnuh hin, bơngai teh đak tơgŭm hăm akŏm kơ sô̆ jên hloh 2 ti hlak jên.

Kĭ pơkăp tơdrong jang hơdai sơnăm 2024, Kŏng ti tơm Tân Cảng Sài Gòn păng Khŭl tơroi tơbăt Anih jang Đảng 3 dêh char: Kon Tum, Gia Lai păng Đăk Nông băt hơdăh hơnơ̆ng hơtŏk loi dơ̆ng tơroi tơbăt, hơtŏk ‘lơ̆ng đon hlôh vao đơ̆ng kang ƀô̆, đảng viên, hŏk tro, sinh viên păng rim răih kon pơlei găh trong jang tơgŭm, khôi luơ̆t đơ̆ng Đảng, Teh đak hăm tơdrong đak dơsĭ, achon đak dơsĭ; Pơm lơ trong jang tơroi tơbăt đơ̆ng trong jang hơiă truh pơgơ̆r pơlong, ‘măng pơlong chă hơlen lăng găh đak dơsĭ, achon đak dơsĭ; Tŭn pran tơdrong jang krao hơvơn kon pơlei, vei lăng sơđơ̆ng tơdrong arih sa tơpôl lơ̆m dêh char.