Hlŏh 1 sơnăm ‘nâu, đak hơdrâm kơ plei O Gia, xăh Ia Pếch, apŭng Ia Grai athei hŭt lê̆, ƀĕnh kơ ‘ngiĕt ngăl. Kơlih yoa rim măng, rim năr ƀât đak tơ ‘nglang âu tôch kơƀou ich nhŭng đơ̆ng tơdrong jang rong kon tơrong găh tu ro jur. Ƀok Siu Xuân, bơngai lơ̆m pơlei tôch tơtŏ jơhngâm pơma: “Đak tơ nglang vă nhă păng pih hơbăn ao. Đơ̆ng năr anih rong nhŭng pơchŏh hŭt đak ‘mê̆ tơ̆ âu, kon pơlei ưh pă gơ̆h yoa bơih, dang ei ƀou tôch kơnê̆, đak ich nhŭng ro jur tơ̆ âu ‘nhơ ‘nhuĕl tôch kơ ‘mê̆. Adrol ki đe pơchŏh hŭt tơ̆ kơ ‘năr, dang ei đe pơchŏh tơ̆ kơmăng. Kon pơlei pơm hla ar athei tang lê̆ ‘măng anih rong âu, mă lei ưh đei ƀôh đe tơl yă kiơ".

Kơplăh ‘nŏh, tơ̆ apŭng Chư Prông, hrei ‘nâu đei 61 tơdrong jang rong kon tơrong oei pơm hla ar apinh tơmât jên jang păng đei tơdrong jang đĭ jang xa bơih, iŏk đei 29% tơdrong jang rong kon tơrong tơ̆ dêh char Gia Lai. Hơdrô̆ xăh Ia Piơr đei 19 tơdrong jang, xăh Ia Lâu kŭm đei 16 tơdrong jang. ‘Nâu kŭm jing tơdrong mă kon pơlei oei tôch tơtŏ đon đơ̆ng ki yoa hơnơ̆ng hrip hơyuh ƀou kơnê̆ đơ̆ng dôm anih rong kon tơrong. 

Ƀok Rah Lan Song Linh- Phŏ Kơdră Anih vei lăng jŏh ayŏ kơ dŏ xoang tơpôl kơ Jơnŭm pơgơ̆r kon pơlei dêh char Gia Lai hlôi jur lăng tơ̆ dô̆m anih rong kon tơrong pơm ‘mê̆ ‘mach cham char, pơma tơlĕch nơ̆r apinh lơ̆m jơ Hôp Jơnŭm pơgơ̆r kon pơlei dêh char Gia Lai. Ƀok akhan, tơdrong ‘nâu gơ̆h sek tơlang đơ̆ng blŭng tơdrong jang hloi ră: “Tơ̆ apŭng Chư Prông, dang ei tơdrong jang rong nhŭng, mă loi tơ̆ xăh Ia Piơr, hlôi đei nơ̆r sek phak păng gơ̆t ưh ăn bơ̆ jang bơih. Mă lei anih jang oei hơnơ̆ng pơchŏh hŭt đak ‘mê̆, jing pơm ăn kon pơlei tôch blĕk. Đơ̆ng blŭng hloi, mưh jur dăr lăng, chă anih ăn anih jang jang xa, lơ liơ mă ưh ƀôh tơdrong jang ‘nâu oei găh tu đak thoi noh, jê̆ tơring kon pơlei oei xa thoi nŏh vă roi tơbăt ăn anih jang kơpal set hơlen, tơlĕch đei trong jang nai.”

Mă tơpă, vă 1 tơdrong jang rong kon tơrong gơ̆h bơ̆ jang athei yak hlŏh lơ tơdrong ‘mơ̆i, đơ̆ng pơm hla ar apinh tơmât jên jang, hơlen năng tơdrong đei ƀơm truh cham char păng pơm hla ar đei tôm tơdrong kăl vă tơmât jên jang, rong kon tơrong. Mă loi hăm tơdrong ƀơm truh cham char, dôm tơdrong jang athei hơlen năng ngăl, pơm hla ar pơkăp vei lăng cham char kiơ̆ tơdrong jang dang yơ. Mă tơpă, đei lơ anih jang “ôn" kuă pơm hla ar ƀơm truh cham char, chu pơm glăi bưh yoa jên phak ưh kơ lơ, tam mă pơm tơhli đon đe sư.

Ƀok Lưu Trung Nghĩa- Kơdră Anih vei lăng choh jang xa păng atŏk tơiung tơring tơrang dêh char Gia Lai tơblang: “Hrei ‘nâu tơdrong sek phak, tơ̆ apŭng lăp sek phak hăm dôm tơdrong jang păh lăp păng iĕ, lăp phak đơ̆ng 10 - 15 triu đĕch; oei hăm anih rong tih, sek phak đơ̆ng 15 - 20 triu. Lăp tŏ sĕt đĕch pơtêng hăm kơsô̆ jên tơmât jang truh dôm jĭt ti đơ̆ng anih jang. Mĭnh tơdrong dơ̆ng ‘nŏh hrei ‘nâu oei tam mă đei tơdrong hơgăt găh hơlen năng kơmăy kơmŏk hăm dôm tơdrong jang rong kon tơrong âu."

Kiơ̆ tơdrong chih jô̆ đơ̆ng Anih vei lăng tơmam drăm, cham char Gia Lai, dang ei tơ̆ dêh char đei 209 tơdrong jang rong kon tơrong đei asong tơmât jên jang păng oei pơm hla ar apinh jang. Mă lei lăp tŏ sĕt tơdrong jang đĕch pơm tôm hla ar hơlen năng găh cham char. Đơ̆ng blŭng sơnăm truh dang ei, kiơ̆ đơ̆ng chă hơlen năng đơ̆ng anih jang kơpal, Anih vei lăng kon pơlei dêh char Gia Lai sek phak 7 anih jang yoa ưh đei hla ar hơgăt vei lăng cham char, mă lei oei hơnơ̆ng bơ̆ jang. Mă đơ̆ng thoi nŏh ră, kiơ̆ ƀok Phạm Minh Trung – Kơdră Anih vei lăng tơmam drăm, cham char Gia Lai, trong jang tơ̆ hơnăp kơnh, vă vei lăng ‘lơ̆ng cham char tơ̆ dôm tơdrong jang rong kon tơrong, ‘nŏh athei đei trong vang jang hơdoi, sek tơlang mă lăp đơ̆ng dôm anih jang kơpal tơ̆ dêh char hai: “’Nao âu nhôn lăp sek tơlang găh tơmam drăm, cham char đĕch. Mă lei 1 tơdrong jang vă jang xa sư đei ƀơm truh tơdrong tơmât jên jang đơ̆ng Anih tơlĕch nơ̆r sơkơ̆t tơmât jên jang kơ dêh char dơ̆ng, ƀơm truh tơdrong rong kon tơrong, jang thŭ y đơ̆ng Anih vei lăng choh jang xa păng atŏk tơiung tơring tơrang dêh char, ƀơm truh tơ̆ tơring đei tơdrong jang hai, mưh pơm glăi ‘nŏh ƀơm truh tơ̆ công an ‘năi. Tơdrong ‘nâu athei đei tơdrong vang jang atŭm đơ̆ng dôm anih jang kơpal vă hơlen năng păng sek tơlang ‘lơ̆ng, ưh ăn đei tơdrong anih jang đei hơlen năng, sek phak bơih oei bơ̆ jang hơlơ̆k dơ̆ng”.

Vă hơmet pơ ‘lơ̆ng dôm tơdrong ‘nâu, Anih vei lăng kon pơlei dêh char Gia Lai đei hla ar chih pơtho ăn Anih tơlĕch nơ̆r sơkơ̆t, tơmât jên jang dêh char jang hơdoi hăm dôm anih jang kơpal, tơring tơrang hơnơ̆ng pơtho tơƀôh trong pơm hla ar tơmât jên jang kiơ̆ tơdrong hơgăt; bơ̆ jang ‘lơ̆ng dôm tơdrong hơgăt vei lăng cham char; iŏk pơdreu thuê̆ hăm 1,2 tơdrong jang. Anih tơlĕch nơ̆r sơkơ̆t tơmât jên jang Gia Lai ăn tơbăt, hăm anih rong kon tơrong, Anih roi tơƀôh tơgŭm ăn Anih vei lăng kon pơlei dêh char athei kơchăng mưh sơng iŏk tơdrong jang, lăp sơng iŏk dôm tơdrong jang tih, rong kon tơrong klĕp ‘lơ̆ng, jang hăm kơmăy kơmŏk ‘nao vă vei lăng ‘lơ̆ng cham char păng rim tơdrong jang athei đei hloi anih pơm tơmam đơ̆ng rong kon tơrong vă gơ̆h đei kơjă kăp ƀiơ̆; ưh đei sơng iŏk dôm tơdrong jang iĕ, kơmăy kơmŏk so.