Hlŏh 2 khei đơ̆ng rŏng kơ gre continer tâm mât tơ̆ hnam jê̆ kơchơ 312, xăh Đắk R’la, apŭng Đắk Mil, dêh char Đắk Nông, klo kăn ƀok Hoàng Văn Tuấn mât tơ̆ mir pơm păi hnam oei. Tơdrong ơh sơ ‘ngon yoa 2 ‘nu kon lôch đơ̆ng gre tâm hnam âu oei đei hơnơ̆ng đĕch. Ƀok tơroi: “Mĭnh vât hiong hloi pơđĭ 2 ‘nu kon ‘nŏh ơh sơ ‘ngon ưh kơ kĕ tôch ôh. Dang ei pơm păi hnam tơ̆ âu vă oei pơgia, tơ̆ hnam so ki hơnơ̆ng kơ ƀlŏk truh, arih ưh kơ gơh. Đe mih ma duch nă athei pơm hnam tơ̆ găh rŏng, mă lei mă pơm tơ̆ găh rŏng ră lơ liơ mă gơ̆h arih xa yoa oei lơ̆m pơgar ‘nŏh ‘năi. Jur oei tơ̆ âu bơih, mă lei năng tơ̆ yơ kŭm nhen ƀôh 2 ‘nu kon, ơh dêh.”

Gre tâm preh băl ưh lăp pơm ăn lơ bơngai lôch, kơtum kơtŏng ‘nhŏng oh ơh sơ ‘ngon đĕch, mă bơngai huơ̆r gre tâm đe kŭm pŭ kơbăt dôm yơ tơdrong ơh sơ ‘ngon, pơmat tat, ƀât lăp đei rôp phak dơ̆ng. ‘Nhŏng Nguyễn Văn Chí, tơ̆ xăh Đắk Búk So, apŭng Tuy Đức, dêh char Đắk Nông tôch ơh akhan: phak oei tơ̆ hnam phak 3 sơnăm bơih, mă lei tơdrong hao gre tâm ƀơm đe oei hơnơ̆ng đei lơ̆m kơ̆l ‘ngok kơdih đĕch. Gơmăng ‘năr 15/3/2021, ‘nhŏng huơ̆r gre tih năm chơ tơmam ăn đe, yoa kơdâu hrĕnh păng ưh đei năng trong kơna tâm ƀơm 2 ‘nu hŏk tro hao gre điên.

‘Nhŏng Chí tơroi: “Inh ‘nao brŏk đơ̆ng hnam phak. Ƀât oei tơ̆ hnam phak ki inh hơnơ̆ng ƀlŏk truh tơdrong hao gre tâm ƀơm mon hŏk tro lôch. Kuă kiơ ƀât doh ki inh lê̆ kơ hăt hot, kơdâu hrĕnh, lei rŏ năng huei tâm đe mơ̆n. Dang ei brŏk đơ̆ng hnam phak, mă lei inh ưh pă pơ̆n huơr gre dơ̆ng bơih, rŏ năng vă jang tơdrong jang nai chă man bơ̆n hnam, pơm công nhân tơ̆ anih jang kơmăy Bình Dương dăh mă Sài Gòn dơ̆ng đĕch bơih ‘nâu.”

Kiơ̆ Anih vei lăng sơđơ̆ng tơ̆ trong nơnăm dêh char Đắk Nông, 3 sơnăm vih tơ̆ âu, tơdrong hao gre tâm preh băl tơ̆ dêh char jur ƀiơ̆. Mă lei, kơsô̆ gre tâm preh băl dêh, tôch hơmơt nhen roi vă tŏk. Tơdrong tơm ‘nŏh yoa tơdrong pơm glăi đơ̆ng bơngai huơ̆r gre păng 1 păh ‘nŏh yoa trong gre tam mă ‘lơ̆ng. Ƀok Nguyễn Nhân Bản – Kơdră AQnih vei lăng trong nơnăm, chơ chuĕn dêh char, Phŏ Kơdră Anih vei sơđơ̆ng trong nơnăm dêh char Đắk Nông, roi tơbăt 1,2 trong jang tơm vă găn ƀiơ̆ gre tâm preh băl:

“Anih vei lăng sơđơ̆ng trong nơnăm dêh char pơtho ăn dôm anih jang kơpal tơlĕch lơ trong roi tơbăt, pơtho tơƀôh luơ̆t vei sơđơ̆ng tơ̆ trong gre vă hơtŏk đon ăn bơngai hao gre kơdâu tơ̆ trong; hơtŏk tơdrong dăr joang, sek tơlang tơpăt dôm bơngai pơm glăi. Hơnơ̆ng chă hơlen năng, pơm hơmet ming trong, kăl loi ‘nŏh hơmet mă ‘lơ̆ng dôm anih đa đei gre tâm preh băl, tôch krê hơmơt. Hơtŏk tơdrong ‘lơ̆ng mưh pơtho, pơgơ̆r thi, ƀơk ƀăng huơ̆r gre, khăm hơlen gre tih, hơtŏk tơdrong jang hơdoi vang bơ̆ jang ‘lơ̆ng tơdrong vei sơđơ̆ng tơ̆ trong nơnăm.”   

Gre tâm preh băl jĭ tơdrong tôch tơtŏ lơ̆m đĭ đăng tơpôl, yoa tơdrong răm đơ̆ng sư tôch tih păng đei đunh đai. Vă găn ƀiơ̆ gre tâm preh băl, kŭm hăm dôm trong jang đơ̆ng anih jang kơpal tơlĕch, rim bơngai athei hơtŏk đon kơchăng, pơm kiơ̆ ‘lơ̆ng luơ̆t mưh hao gre kơdâu tơ̆ trong. Kiơ̆ đơ̆ng noh, gơ̆h vei lăng kơdih kâu păng vang tơgop pơm tơjur ƀiơ̆ dôm tơdrong ơh sơ ‘ngon, hiong răm yoa đơ̆ng gre tâm preh băl.