Phŏ Kơdră tơm vei lăng pơtho pơhrăm Hoàng Minh Sơn tơroi, khei ‘năr âu ki kŭm đei đon pơngơ̆t găh tơdrong ưh kơmăh hla ar hŏk lăm 4, lăm 8 păng lăm 11. Tơdrong tơm ‘nŏh, yoa 1 păh dôm tơring sơnăm ‘nâu chă rơih hla ar hŏk hiơ̆ ƀiơ̆, 1 păh ‘nŏh yoa tơdrong kĭ tơlĕch kơjă đơ̆ng dôm tơring hai. Mă lei truh dang ei, dôm tơring đĭ kĭ kĕh đang bơih. Kơdră chĕp kơ̆l Anih tơm vei lăng pơtho pơhrăm lơ 'măng bơ̆ jang hăm kơdră chĕp kơ̆l Hnam kơmăy in Kơsơ̆p hla ar pơtho pơhrăm Việt Nam vă vang hơmet pơ 'lơ̆ng dôm tơdrong pơmat tat, kơchăng in kơsơ̆p hla ar păng hlôi in đang kơsơ̆p hla ar jŏk dôm sơnăm adrol ki:

“Hơdrô̆ hăm hla ar hŏk lăm 4, lăm 8 păng lăm 11 – ‘nŏh jĭ hla ar ‘nao, dang ei đĭ pơgơ̆r rơih anih jang păng in dang 80% bơih. Oei dang 20% gô lăng dôm tơring roi tơbăt tam tôm ưh vă Hnam kơmăy in kơsơ̆p hla ar hŏk pơhrăm Việt Nam tơlĕch trong in dơ̆ng. Păng vă hơnơ̆ng in tôm vă pơtruh tơtom ăn sơnăm hŏk ‘nao, đei tôm hla ar hŏk ăn dôm lăm lăm 4, 8, 11. Thoi nŏh gô đei tôm hla ar hŏk ăn jăl hŏk phô thŏng.”

Hăm tơdrong chih hơmet kơsơ̆p hla ar hŏk, trong asong ăn tơpôl vang chih, in kơsơ̆p hla ar hŏk ‘nŏh jĭ trong jang tih hlôi đei tơlĕch lơ̆m Tơdrong tơchơ̆t kơsô̆ 88 sơnăm 2014 đơ̆ng Quốc hội. Quốc hội jăl 14 kŭm đei tơdrong tơchơ̆t kơsô̆ 122 ‘nŏh jĭ pơgơ̆r chih hơmet hla ar hŏk kiơ̆ trong asong tơpôl vang jang tơdăh đei 1 môn hŏk mă hơdăh hlôi chih đei tŏ sĕt hlŏh 'nŏh 1 kơsơ̆p hla ar hŏk đei hơlen năng, tơlĕch yoa 'nŏh ưh kăl pơgơ̆r chih hơmet kơsơ̆p hla ar hăm jên tĕh đak ăn mon hŏk 'nŏh dơ̆ng. Dang ei, đĭ đăng môn hŏk đei hla ar pơtho ngăl.

Phŏ Kơdră tơm Hoàng Minh Sơn tơroi: “’Măng mă âu đĭ đăng lăm hŏk hlôi đei kĭ ăn (9/12 lăm) tơtă đei 3 kơsơ̆p hla ar hŏk ngăl. Anih tơm vei lăng pơtho pơhrăm vă bơ̆ jang tơdrong tơchơ̆t đơ̆ng Quốc hội – Tơdrong tơchơ̆t 122. Truh âu kơnh vă hơnơ̆ng hơlen năng păng kĭ tơlĕch dơ̆ng 3 kơsơ̆p hla ar- 3 kơsơ̆p hla ar hŏk lăm hơtuch jăl 'nŏh lăm 5, 9, 12”.

Hop akŏm mă 25 kơ Anih chĕp kơ̆l pơgơ̆r Quốc hội oei pơgơ̆r tơ̆ Hà Nội hlôi pơgơ̆r hơlen năng kiơ̆ tơdrong jang "Bơ̆ jang kiơ̆ tơdrong tơchơ̆t kơsô̆ 88 Quốc hội jăl 13 păng Tơdrong tơchơ̆t kơsô̆ 51 Quốc hội jăl 14 găh tơplih ‘nao tơdrong pơtho pơhrăm, hla ar hŏk phô thŏng''. Anih chĕp kơ̆l pơgơ̆r Quốc hội athei Anih tơm vei lăng pơtho pơhrăm pơgơ̆r chih hơmet 1 kơsơ̆p hla ar mă tôm đơ̆ng lăm 1 truh lăm 12 đei 137 kơ̆l kơsơ̆p hla ar. 

Kiơ̆ đơ̆ng dăr lăng ăn ƀôh, tơdrong pơtho hŏk phô thŏng 2018 đei chih pơjing tôch hơlen, 'lơ̆ng hơiă, hlôi pơm tơplih đơ̆ng pơtho đon hlôh vao jing tơƀôh trong hơtŏk jơhngâm đon gơ̆h hơgei ăn hŏk tro; chih hơdăh 05 tơdrong 'lơ̆ng păng 10 tơdrong rơgei kăl đei tưk tơiung hăm hŏk tro phô thŏng. Ƀai chih lơ̆m kơsơ̆p hla ar hŏk 'moi kiơ̆ tơdrong pơtho hŏk phô thŏng 'nao. Tơdrong chih tơlĕch kơsơ̆p hla ar hŏk hlôi akŏm đei lơ bơngai juăt jang, bơngai jang khoa hŏk, thây kô rơgei đei bưng ai, hlôh vao jrŭ.

Tơdrong tơplih ‘nao pơtho pơhrăm, hla ar hŏk ‘nŏh jĭ tơdrong jang tôch gĭt kăl, iŏk đei tơdrong tơrĕk đơ̆ng lơ bơngai tăh hla păng kon pơlei. Kiơ̆ dôm bơngai tang măt, tơdrong pơtho pơhrăm phô thŏng athei pơm kiơ̆ luơ̆t ‘nŏh tôch trŏ, mă lei hla ar pơtho lăp chih hơgăt găh tơdrong hŏk chư đĕch. Đơ̆ng nŏh tơdrong pơtho chư ăn jăl hŏk phô thŏng kŭm tôch gĭt kăl, athei đei trong vei lăng mă kơjăp đơ̆ng tĕh đak. Yoa thoi nŏh kăl đei đon xă vă hơmet ming dôm tơdrong kăl vă tơdrong pơtho pơhrăm gơ̆h năm trŏ trong.

Ƀok Đỗ Văn Chiến – Kơdră Anih Trung ương MTTQ đei nơ̆r athei: "Tơdrong athei jang dang ei hloi, kăl loi jĭ athei đei trong vei lăng kơjăp đơ̆ng tơdrong chih hơmet, in tơlĕch, tơmât yoa păng bơ̆n athei vei lăng kơjă hla ar hŏk mă lăp hăm jên jang xa đei đơ̆ng kon pơlei hrei 'nâu. Kon pơlei oei athei kơsơ̆p hla ar hŏk 'nâu lê̆ tĕh đak vei lăng kơjă. Hơmet ming bơ̆n athei jang. Kơlih yoa tơdăh yă kiơ ăn kơ dôm bơngai pơmat tat kiơ̆ kơ inh 'nŏh jĭ chư, 'nŏh gơ̆h gei đunh hlŏh. Nơ̆r apinh đơ̆ng Khul dăr lăng 'nŏh hăm trŏ, hăm gơ̆h jang dăh mă ưh ‘nŏh athei tơchĕng hơlen mă 'lơ̆ng, tơl tơblang mă tơgăl".

Kơdră Quốc hội athei jăh tơlĕch hla ar pơtho trong chih hơdăh kơjă hla ar hŏk, chih mă rơđăh, vei lăng mă kơjăp jên pơm tơlĕch, tơjur ƀiơ̆ jên pơdro hơlam, tơjur ƀiơ̆ jên hơpăh vă pơm tơjur kơjă hla ar hŏk. Kơdră Quốc hội athei bơ̆ jang mă ‘lơ̆ng kiơ̆ tơdrong tơchơ̆t 88 Quốc hội găh tơplih ‘nao tơdrong pơtho pơhrăm, hla ar hŏk phô thŏng:

"Tơdrong tơchơ̆t 88 chih: Anih tơm vei lăng pơtho pơhrăm athei pơgơ̆r chih tơlĕch 1 kơsơ̆p hla ar hŏk tôm tĕch đơ̆ng lăm 1 truh lăm 12 đei 137 kơ̆l hla ar. Rim khul grŭp, bơngai nai đei pơlung vang chih tơlĕch hla ar hŏk mĭnh dăh mă ƀar pêng kơsơ̆p hla ar hŏk kiơ̆ kơdih gơ̆h jang, ưh kăl chih đei tôm kơsơ̆p hla ar hŏk hloi ôh. Nơ̆r pơtho đơ̆ng tơdrong tơchơ̆t 88 'nŏh thoi nŏh. Tơdrong tơchơ̆t 122 ‘nŏh jĭ trong sek tơlang kơplăh ƀât doư̆h đĕch, 'nŏh jĭ dôm kơsơ̆p hla ar yơ đei anih tĕch mơdro lăp bơih mă lei tam đei tôm jên in chih 'nŏh lê̆ ƀât dŏh 'mơ̆i. Tơdrong tơchơ̆t 122 ưh đei hơdrơ̆k păng ưh đei tơplih ăn tơdrong tơchơ̆t 88. Yoa thoi nŏh tơdrong hrei 'nâu lơ̆m khul dăr lăng pơma tơlĕch inh kŭm ƀôh tôch tơgăl, bơ̆n athei tơchĕng hơlen ming dơ̆ng".