Hơla yơ̆p tơm ‘long tơter trong gre 14, tơ̆ hơnăp ‘măng jang Hnam trưng Trung học phổ thông Quang Trung, xăh Đắk R’la, apŭng Đắk Mil, dêh char Đắk Nông, đe linh công an oei hơlen năng tơdrong pơm kiơ̆ luơ̆t vei sơđơ̆ng tơ̆ trong gre hăm đe ŏh hŏk tro hao gre hon đa. Tơ̆ âu, kŭm hăm tơdrong hơlen năng, công an oei pơtho tơƀôh, tơtă ăn đe oh pơm kiơ̆ mă ‘lơ̆ng Luơ̆t hao gre kơdâu tơ̆ trong.

Oh Nguyễn Anh Trung, hŏk tro lăm 12A6 tơroi: “Đe ma công an hơnơ̆ng chă dăr lăng vă găn lê̆ tơdrong pơm glăi, thoi noh tôch ‘lơ̆ng. Đe ma hơlen năng gre, ƀôh tơdrong glăi păng sek tơlang tơtom ‘lơ̆ng”.

Lơ̆m tơdrong dăr hơlen, khul linh công an hlôi truh tơ̆ Hnam trưng THPT Quang Trung pơgơ̆r roi tơbăt, pơtho tơƀôh, ƀơk hla ar chih tơroi găh dôm tơdrong hơgăt đơ̆ng luơ̆t vă vei sơđơ̆ng tơ̆ trong gre. Công an oei jang hơdoi hăm hnam trưng, hơlen năng tơ̆ hnam ming gre kơ hnam trưng păng dôm anih vei gre jŭm dăr hnam trưng, roi tơƀôh, tơtă ăn hŏk tro ưh gơ̆h hao gre đei xi-lanh hlŏh 50cm3 mưh tam mă tôm sơnăm hao gre.

Đơ̆ng rŏng kơ kĭ pơkăp pơm kiơ̆ Luơ̆t hao gre kơdâu tơ̆ trong, oh Trần Thị Thu Thanh, lăm 12A1, ăn tơbăt: “Mon ƀôh tôch đei yoa păng tôch kăl mưh tơgŭm ăn nhôn hlôh vao lơ ƀiơ̆ găh tơdrong hơgăt vei lăng sơđơ̆ng ‘lơ̆ng tơ̆ trong gre; păng kiơ̆ đơ̆ng noh vĕh ver đei dôm tơdrong glăi, ƀônh đei hlŏh mưh hao gre kơdâu tơ̆ trong.”

Ƀok thây Nguyễn Văn Ngọc, Hiê̆u trơng Hnam trưng THPT Quang Trung ăn tơbăt, Hnam trưng pơm tơter trong gre 14, trong đei gre yak vih vât tôch lơ kơna đei lơ tơdrong krê pơ̆k gre. Hnam trưng jang hơdoi hăm dôm khul jang kơpal hơnơ̆ng roi tơƀôh vă hŏk tro đei đon pơm kiơ̆ mă ‘lơ̆ng dôm tơdrong hơgăt mưh hao gre kơdâu tơ̆ trong: “Mă mônh ‘nŏh hnam trưng athei đe oh kĭ pơkăp, mă 2 hơnơ̆ng hơlen năng tơdrong pơm kiơ̆ dôm tơdrong hơgăt; păng hơnơ̆ng tơtă ăn đe ŏh lơ̆m jơ hôp rim giĕng ‘năi. Rim sơnăm hnam trưng jang hơdoi hăm công an pơgơ̆r lăm hŏk tơ̆ ‘ngoăih ăn đe oh chă hơlen năng Luơ̆t hao gre kơdâu tơ̆ trong vă vei lăng sơđơ̆ng ‘lơ̆ng tơ̆ trong gre.”

Khei ‘năr âu ki, khul linh kanh sat vei lăng tơ̆ trong nơnăm Đắk Nông hơnơ̆ng hơtŏk tơdrong roi tơbăt, pơtho tơƀôh luơ̆t hao gre kơdâu tơ̆ trong ăn hŏk tro tơ̆ dôm hnam trưng. Thượng tá Phạm Quốc Lập, Kơdră Anih kanh sat vei lăng tơ̆ trong gre - Công an dêh char Đắk Nông ăn tơbăt, kŭm hăm hơnơ̆ng dăr joang, hơlen năng, sek tơlang tơpăt dôm bơngai pơm glăi, anih jang chih hơdăh tơdrong roi tơbăt hơtŏk đon hlôh vao, đon pơm kiơ̆ luơ̆t oei hơnơ̆ng jĭ trong jang tơm hlŏh vă vei sơđơ̆ng tơ̆ trong gre hăm sơnăm hŏk tro:

“Khul linh kanh sat vei lăng tơ̆ trong gre kơchăng jang hơdoi hăm Anih vei lăng sơđơ̆ng tơ̆ trong gre dêh char hơtŏk tơdrong roi tơbăt tơ̆ dôm hnam trưng, blŭng a jĭ tơ̆ dôm tơring krê hơmơt tơter trong gre Hồ Chí Minh, tơ̆ trong gre 28 păng tơ̆ tơring kơdrâm kơ dôm apŭng, plt lơ̆m dêh char Đắk Nông. Mă 2 ‘nŏh kơchăng jang hơdoi hăm dôm anih jang kơpal roi tơƀôh ăn mĕ ƀă hŏk tro, lê̆ pơjao gre ăn kon mưh tam mă tôm sơnăm gơ̆h huơ̆r gre. Kŭm hăm ‘nŏh, tơlĕch trong roi tơbăt truh tơ̆ dôm tơring hơtăih yăih păng jang ‘lơ̆ng tơdrong pơjing ‘măng jang hnam trưng sơđơ̆ng ‘lơ̆ng hăm tơdrong hao gre lơ̆m dêh char.