Tơdrong akŏm noh kăp gĭt lơ̆m vei răk tơƀăk mong tơdrong tơguăt tơguăl, tơbôl kăp gĭt kơ 2 hơdrung hơdrĕch Việt Nam – Cuba, mă kăl noh hăm đe mơlôh pơlei tơm. Tơdrong tơbôl ‘nhŏng oh kơ 2 teh đak Việt Nam – Cuba hlôi akŏm păng hơtŏk lơ̆m tơdrong le lăi gah hnưr hơrih kơ 2 hơdrung hơdrĕch.

Hloh 60 sơnăm kơ âu, jô̆ đơ̆ng năr 2 teh đak iung jang tơbôl (2/12/1960), 2 hơdrung hơdrĕch tơguăt tơgŭm dih băl lơ̆m tơdrong iung tơjră kơyuơ tơdrong rơngei hiôk hian păng hrei âu hơnơ̆ng tơguăt atŭm dih băl kơjăp lơ̆m tơdrong tơ-iung pơjing păng vei lăng chăl xah hô̆i chủ nghĩa tơ̆ rim teh đak. ‘Nâu tơpă jing tơdrong tơbôl, tơguăt ‘nhŏng oh, tơguăt kơjăp hlôi jing um pơtih kơ chăl hơrih, jing mŭk drăm kăp gĭt mă 2 Đảng păng kon pơlei 2 teh đak Việt Nam - Cuba hơnơ̆ng vei răk tơƀăk mong, hơtŏk păng pơdjoi ăn chăl kon sau ning nai kơnh.