‘Măng hop akŏm mă 10 Jơnuưm chĕp pơgơ̆r Tơdrong pơkăp 2003 găh vei lăng năng tông mŭk drăm joh ayŏ gĭt kăl hlôi đei vang năm đơ̆ng 183 teh đak lơ̆m khul păng 100 teh đak dăr lăng. Iung pơma tơ̆ pơgơ̆r blŭng a Hop akŏm, Kơ iĕng Kơdră chĕp pơgơ̆r Hơnih tơm jang tơbôl, ƀok Hà Kim Ngọc sơkơ̆t hơdăh, Việt Nam hăm 15 mŭk drăm joh ayŏ gĭt kăl đei pôk pơ ư, 550 mŭk drăm jŏh ayŏ gĭt kăl teh đak, ling lang lăng ba kơjăp vei răk tơƀăk mong mŭk drăm jŏh ayŏ gĭt kăl dăr sơnăm, ling lang tơ iung pơjing păng pơm pơkeh trong jang, khôi luơ̆t teh đak, tơjê̆ ou hloh ‘noh Tơdrong jang tơm Teh đak găh Atŏk tơ iung Tơdrong oei sa Joh ayŏ ‘lơ̆ng rŏ truh sơnăm 2045 păng Khôi luơ̆t Mŭk drăm Joh ayŏ gĭt kăl hơmet ming. Rim teh đak lơ̆m khul Tơdrong pơkăp 2003 hôn bơnê kơtang dôm trong jang hlôh vao păng hơdrin đơ̆ng Việt Nam lơ̆m vei răk păng atŏk kơtang tơdrong oei sa joh ayŏ gĭt kăl dăr sơnăm tơgop lơ̆m vei răk dôm tơdrong oei sa joh ayŏ gĭt kăl hơmơt vă hiong dong, vei kơjăp mŭk drăm joh ayŏ tang măt ăn kon bơngai păng tơƀôh tơbăt ăn dôm um rup mŭk drăm joh ayŏ đei vei lăng ‘lơ̆ng lơ̆m apŭng plĕnh teh.