Tơroi lơ̆m hop akŏm, Kơdră tơm tơlĕch nơ̆r sơkơ̆t tơmât jên jang Nguyễn Chí Dũng ăn tơbăt, tơdrong jang mŭk drăm, tơpôl khei 9, jăl khei mă III păng 9 khei sơnăm 2023 hơnơ̆ng đei ƀôh tŏk roi ‘lơ̆ng ƀiơ̆, atŭm hăm ‘nŏh pơma tơƀôh 10 tơdrong ‘lơ̆ng hơiă hlŏh, lơ̆m nŏh pơma hơdăh: Tơdrong jang tŏk ming tôch ‘lơ̆ng, jăl khei đơ̆ng rŏng lơ ƀiơ̆ kơ jăl khei hơdrol, jô̆ atŭm 9 khei tŏk 4,24%, găh grŭp dôm tĕh đak jang tŏk pran lơ̆m tơring păng lơ̆m apŭng plenh tĕh. Dôm anih jang, tơdrong jang đei ƀôh jang tŏk ming sơđơ̆ng ‘lơ̆ng, mă loi tơdrong jang kơmăy tŏk pran ‘lơ̆ng dơ̆ng.

Tơ̆ hop akŏm, kơdră chĕp kơ̆l dôm anih tơm, tơring tơrang tơchĕng ‘lơ̆ng tơdrong chĕp kơ̆l pơgơ̆r tôch pran đơ̆ng Khul kơdră tĕh đak, Thủ tướng tĕh đak, tơtom sek tơlang dôm tơdrong oei tơhlăk tơ̆ tơring. Pơma pơtôch hop akŏm, Thủ tướng Phạm Minh Chính pơma tơƀôh dôm tơdrong hlôi jang đei, tơdrong tơm oei tam mă pran ‘lơ̆ng păng ƀai hŏk kăl đei chih iŏk. Tơ̆ hơnăp kơnh Thủ tướng athei dôm anih jang, tơring tơrang hơmet mă ‘lơ̆ng dôm trong jang, vă tơjră pơđĭ dôm tơdrong nol, bơ̆ jang đei yoa ‘lơ̆ng, hơnơ̆ng druh kiơ̆ trong jang tơm ‘nŏh vei sơđơ̆ng mŭk drăm lơ̆m tĕh đak, tang găn kơjă tơmam tŏk, jang tŏk pran ‘lơ̆ng, vei lăng ‘lơ̆ng tơdrong arih xa ăn kon pơlei; vei kơjăp tơdrong sơđơ̆ng chinh trĭ, tơpôl, tơdrong sơđơ̆ng kơ tơpôl…