Lơ̆m dôm năr âu ki, hăm tơdrong mă Ƀok Nguyễn Phú Trọng, Tổng Bí thư Ƀan châ̆p hanh Trung ương Đảng Cộng sản Việt Nam lôch hiong, kơdră kơpal kơ lơ teh đak, rim jơnŭm jang apŭng plenh teh, lơ khul đảng dơnơm păng bôl boăl truh đơ̆ng 103 teh đak, tơring păng 32 jơnŭm jang apŭng plenh teh hlôi pơtruh jê̆ 500 kơthơ vang ơh sơ-‘ngon hăm Ƀan châ̆p hanh Trung ương Đảng Cộng sản Việt Nam, Kơdră teh đak Cộng hòa xã hội chủ nghĩa Việt Nam Tô Lâm, Thủ tướng teh đak Cộng hòa xã hội chủ nghĩa Việt Nam Phạm Minh Chính, Kơdră Kuôk hô̆i teh đak Cộng hòa xã hội chủ nghĩa Việt Nam Trần Thanh Mẫn, kơdră juăt jang kơpal kơ Ƀan Ƀĭ thư Trung ương Đảng Cộng sản Việt Nam Lương Cường, rim đe kơdră kơpal kơ Đảng, kơ Jơnŭm pơgơ̆r teh đak, Kon pơlei Việt Nam păng unh hnam Nhap Ƀok Tổng Bí thư Nguyễn Phú Trọng. 100 khul kơpal apŭng plenh teh hlôi truh pơjôk păng pơtruh kơvang pơkao vang ơh sơ-‘ngon tơ̆ Việt Nam păng 3.500 khul kơpal hlôi truh pơjôk Nhap Ƀok Tổng Bí thư Nguyễn Phú Trọng tơ̆ dôm anih jang tang măt ăn Việt Nam lơ̆m jơ̆p kơpal teh.

Lơ̆m kơthơ pơtruh vang ơh sơ-‘ngon, kơdră kơ rim teh đak, jơnŭm jang apŭng plenh teh, rim khul đảng păng bôl boăl apŭng plenh teh hlôi akŏm đon bơnôh tih tên, ‘mêm kơ-eng păng kŭp yom tih kăp gĭt hăm Ƀok Tổng Bí thư Nguyễn Phú Trọng, pôk bơnê kơ dôm tơdrong tơgop tih tên đơ̆ng Ƀok Tổng Bí thư Nguyễn Phú Trọng hăm tơdrong hơtŏk tơ-iung kơ teh đak Việt Nam păng tơdrong jang tơbôl đơ̆ng Việt Nam păng rim teh đak vang jang, tơƀôh tơdrong hơpơi ‘meh pơtoi hơtŏk hloh jang hadoi hăm Việt Nam lơ̆m tôm tơdrong jang. Pôk bơnê kơ tơdrong tơguăt tơguăl, vang tơgŭm đơ̆ng rim teh đak vang jang, rim khul đảng păng bôl boăl apŭng plenh teh, đe ƀok Kơdră Đảng, Jơnŭm pơgơ̆r teh đak bơ̆n hlôi pơtruh kơthơ ăn đe kơdră dôm teh đak, jơnŭm jang apŭng plenh teh, rim khul đảng păng bôl boăl apŭng plenh teh, bơnê kơ đon bơnôh kăp gĭt păng dôm nơ̆r pơtruh hơlêm hăm tơdrong hiong tih tên đơ̆ng Đảng, Jơnŭm pơgơ̆r teh đak, Kon pơlei Việt Nam păng unh hnam Nhap Ƀok Tổng Bí thư Nguyễn Phú Trọng. Khul Kơdră kơpal kơ Đảng păng Teh đak hơpơi ‘meh atŭm hăm rim teh đak, rim anih jang vang jang pơtoi pơm kiơ̆ tơdrong hơpơi ‘meh đơ̆ng Nhap Ƀok Tổng Bí thư Nguyễn Phú Trọng hơtŏk jang tơbôl, jang hadoi đơ̆ng Việt Nam păng dôm teh đak, dôm jơnŭm jang roi năr roi hơtŏk kơjăp hloh, hơtŏk tơdrong pơyua ăn kon pơlei tơ̆ rim teh đak păng tơgop ăn tơdrong rơngei hiôk hian jang hadoi jơnap sô̆ sôn păng sơđơ̆ng lơ̆m tơring păng lơ̆m apŭng plenh teh.