Kơsơ̆ năr 27/2, tơ̆ Anih tơm Linh vei xơđơ̆ng tơpôl teh đak (Hà Nội), Thương tươ̆ng Hoàng Xuân Chiến, jang lơ̆m Trung ương Đảng, Thư̆ trương Anih tơm Linh vei xơđơ̆ng tơpôl teh đak, Kơdră Anih juăt jang Jơnŭm pơgơ̆r kơ teh đak hơmet răm kơyuơ ƀôm min păng pơgang pơnhŭl hoă hŏk pơrăm đơ̆ng rŏng khei năr tơblăh tơ̆ Việt Nam (Jơnŭm Pơgơ̆r 701) hlôi bơ̆ jang hăm Kơdră jang tang măt ăn Hoa Kỳ tơ̆ Việt Nam  Marc E.Knapper găh tơdrong jang hadoi hơmet răm đơ̆ng ƀôm min pơrăm đơ̆ng rŏng tơdrong tơblăh tơ̆ Việt Nam. Xơkơ̆t đon 'lơ̆ng đơ̆ng Việt Nam lơ̆m tơdrong jang tơbôl hơmet răm đơ̆ng ƀôm min, ngoi đôh đơ̆ng rŏng tơblăh hăm Hoa Kỳ, Thương tươ̆ng Hoàng Xuân Chiến lui ngeh lơ̆m khei năr truh, tơbôl jang hadoi âu gô pơtoi đei hơtŏk pơ-'lơ̆ng; atŭm hăm noh 'meh vă Hoa Kỳ pơtoi tơrĕk tơgŭm đunh đai ăn Việt Nam, tơgop tơgŭm Việt Nam xek tơlang tenh kuăng răm đơ̆ng ƀôm min, ngoi đôh kơyuơ tơdrong tơblăh pơm đei, hơmet pơ-'lơ̆ng dôm tơring teh oei ƀơm kơnê̆ răm, axong trong jang erih xa ăn kon pơlei. Thương tươ̆ng Hoàng Xuân Chiến ră hơdăh Việt Nam gô pơtoi pơm trong hiôk, jang hadoi kơjăp hăm dôm anih jang kơ Hoa Kỳ vă dôm tơdrong jang hadoi kơ 2 păh đei jơnei tơnăp păng đei jơnei nhen tơlĕch tơchơ̆t.