Tổng Bí thư Nguyễn Phú Trọng pơma hơdăh trong jang tơbôl ưh đei tơplih đơ̆ng Việt Nam ‘nŏh chĕp kơ̆l pơgơ̆r kơ dih, rơngei hiôk hian, pơm bôl, jang hơdoi păng jang tŏk; jang kiơ̆ lơ trong jang tơbôl, lơ pang hăm tĕh đak đe. Tổng Bí thư Nguyễn Phú Trọng păng Kơdră tơm Biden drơ̆ng nơ̆r akhan, mă tơpă ăn ƀôh dôm tơdrong tôch gĭt kăl hăm tơdrong pơm hơtŏk tơdrong pơvei Việt Nam – Mi ‘nŏh jĭ năng kăl dôm tơdrong hơgăt lơ̆m tơdrong pơvei đơ̆ng 2 tĕh đak.

Tổng Bí thư pơma hơdăh, đon hlôh vao băl, băt tơdrong jang đơ̆ng băl, năng kăl tơdrong đei yoa tôch tơgăl đơ̆ng băl păng ưh đei plăh găn tơdrong jang đơ̆ng băl ling lang jing tơdrong tôch gĭt kăl. Tổng Bí thư tơchĕng ‘lơ̆ng dôm tơdrong đei drơ̆ng nơ̆r đơ̆ng kơdră chĕp kơ̆l 2 tĕh đak găh Nơ̆r tơchơ̆t atŭm pơm hơtŏk tơdrong pơvei Việt Nam – Mi tŏk jing Tơdrong pơvei jang hơdoi gĭt kăl tôm tơdrong yoa tơdrong rơngei, jang hơdoi păng jang tŏk pran kơjăp. 

Kiơ̆ kơ ‘nŏh, Tổng Bí thư Nguyễn Phú Trọng pơma truh 1,2 trong jang tih vă tưk tơiung tơdrong pơvei Việt Nam – Mi. Lơ̆m nŏh đei tơdrong hơnơ̆ng pơm hơtŏk đon hlôh vao băl, bơ̆ jang mă ‘lơ̆ng dôm tơdrong hơgăt, pơjing đei tơdrong sơđơ̆ng đunh đai, tơƀâp, jang hơdoi tih đơ̆ng dôm anih jang, khul kơdră chĕp kơ̆l păng hơmet pơ ‘lơ̆ng tơdrong pơvei kon pơlei.