Ƀar păh drơ̆ng mĭnh nơ̆r akhan, lơ̆m hloh ƀar sơnăm au ki, Hơnih tơm Kŏng ang ƀar teh đak hlôi hơdrin jang hơdoi iŏk đei jơnei lơ̆m tang găn hơlau, iung tơjră phă pơrăm khul pơm yoch, tơgop vei lăng sơđơ̆ng chinh trĭ, sơđơ̆ng teh đak, sơđơ̆ng dơ̆ng kơjăp tơpôl kơ ƀar teh đak.

Găh jang hơdoi lơ̆m khei năr kơnh, Hơnih tơm Kŏng ang ƀar teh đak sơkơt hơdăh, hơnơ̆ng iung jang hơdoi pơm sơđơ̆ng dơ̆ng kơjăp, sơđơ̆ng ăn tơdrong pơgơ̆r hop akŏm chĭnh trĭ kăl pơgơ̆r tơ̆ teh đak, bơ̆ jang ‘lơ̆ng vei lăng năng tông kon pơlei; hơnơ̆ng iung jang hơdoi iung tơjră phă pơrăm kĕ rim tơdrong pơm glăi klŏh klĕch teh đak nhen tơdrong yoch tih, ma tuý, muk drăm, tĕch răt bơngai, yoch hơlĕnh pơdăr ‘moi kiơ̆ mạng viễn thông, mạng internet. Tơ̆ kơsơ̆ brei, ƀok Tô Lâm, Kơdră chĕp pơgơ̆r Hơnih tơm Kŏng ang hlôi pơma dơnuh hăm ƀok Thái Kỳ - Kơdră chĕp pơgơ̆r Hơnih bơ̆ jang Trung ương Đảng Cộng sản Trung Quốc. Tơ̆ jơ sơng pơma dơnuh, ƀok Thái Kỳ hôn bơnê tơdrong atŏk tơ iung tơgoăt jang hơdoi ƀar păh ƀar Đảng, ƀar Teh đak lơ̆m rim tơdrong ‘moi kiơ̆ trong tơgoăt Jang hơdoi gĭt kăl tôm tong.