Sơnăm au, hăm hơnăp jang Kơdră chĕp pơgơ̆r Hơnih bơ̆ jang ASEAN vei lăng năng tông tŏ ‘mi kial pơrăm, Việt Nam hơdrin tơƀôh hơdăh hơnăp jang ba trong ASEAN ưh khan lăp lơ̆m tơdrong vei lăng sơđơ̆ng, mŭk drăm mă lei truh hloi dôm tơdrong oei sa joh ayŏ-tơpôl, mă tơ̆ au ‘nŏh sơđơ̆ng vei lăng năng tông ‘lơ̆ng hơ iă ăn kon pơlei pơla tơ̆ hơnăp tŏ ‘mi kial pơrăm. 

ASEAN ‘nŏh tơring ƀônh đei ƀơm kơnê̆ tơ̆ hơnăp tŏ ‘mi kial pơrăm nhen: kiăl hơbŭt, đak hơbông, phang pơđang, teh tơdrŏ păng kông ŭnh bluh ... Dôm tơdrong hơdrin lơ̆m jang hơdoi ASEAN găh vei lăng năng tông tŏ ‘mi kial pơrăm hlôi tơgop pơm atŏk kơtang kĕ tang găn păng pơm tơjur tơdrong răm kơ yuơ đơ̆ng tŏ ‘mi kial pơrăm ăn rim teh đak lơ̆m khul; adoi, hăm jơhngơ̆m đon tơgoăt tơgoăl dih băl kơjăp, rim teh đak ASEAN jei pơkăp jang kiơ̆ ‘lơ̆ng trong iung jang kăl ASEAN vă đei jing tơring dơ̆ng hơlau lơ̆m plei teh găh vei lăng năng tông tŏ ‘mi kial pơrăm ‘moi kiơ̆ chă pơma dơnuh, tơbăt dih băl trong jang hơ iă yan au; adoi nhen tơgop lơ̆m rim tơdrong hơdrin iung jang lơ̆m plei teh găh iung tơjră tang găn tŏ ‘mi kial pơrăm.