Lăp đơ̆ng rŏng kơ lêh sơng, Tổng Bí thư Tô Lâm đei jơ tơƀơ̆p Thủ tướng Lawrence Wong, đơ̆ng rŏng ‘noh 2 kơdră chĕp kơ̆l gô pơgơ̆r jơ pơma đam gĭt kăl  vang pơma dơnuh păng tơlĕch ăn dôm trong jang vă pơm ‘lơ̆ng hloh dơ̆ng tơdrong pơvei đơ̆ng 2 Đảng, pơm tơdrong ‘lơ̆ng chĭnh trĭ kơjăp ăn tơdrong pơvei 2 teh đak tơ̆ hơnăp kơnh. Tơ̆ pơma đam, 2 păh  vang drơ̆ng nơ̆r dôm trong jang tih, hơnhăk tơdrong pơvei Jang hơdai gĭt kăl tôm tơdrong Việt Nam - Singapore hơtŏk tơiung ‘lơ̆ng, đei yua, akŏm lơ̆m hơtŏk đon lui chĭnh trĭ ‘moi kiơ̆ pơma dơnuh đơ̆ng khŭl rim kơdră, mă loi ‘noh jĭ kơdră kơpal; pơih să păng pơm ‘lơ̆ng hloh jang hơdai mŭk drăm, mơdro sa, tơmơ̆t jên jang; pơtrŭt jang hơdai găh tơplih kơsô̆, tơplih ‘nao pơcheh hơgei, mŭk drăm rơgoh, ŭnh hơyuh rơgoh; hơtŏk loi dơ̆ng jang hơdai lơ̆m rim tơdrong jang khŭl lĭnh - sơđơ̆ng, joh ayŏ, pơtho pơhrăm, tơmang lăng păng tơƀơ̆p pơma dơnuh đơ̆ng kon pơlei.

Găh dôm tơdrong tơring, 2 păh drơ̆ng nơ̆r hơtŏk loi dơ̆ng tơgoăt mĭnh jơhngơ̆m đon ASEAN, bơngơ̆t truh hơtŏk tơiung kơjăp đơ̆ng dôm tơring iĕ lơ̆m tơring, lơ̆m noh đei tơring iĕ Mê Công, kiơ̆ đơ̆ng noh tơgop ‘lơ̆ng ăn ASEAN hơdrin kơdih, hơnŭk hơnoa păng hơtŏk tơiung kơjăp, hơtŏk hơnăp jang tơm tơ̆ tơring.