‘Năr 15/6, hơnơ̆ng ‘măng năm bơ̆jang tơ̆ dôm dêh char tơring Tŏk bŏk, ƀok Đỗ Tiến Sỹ, Kơdră dơnơm vei lăng Anih radiô nơ̆r pơma Việt Nam (VOV) chĕp kơ̆l khŭl bơ̆jang kơ VOV bơ̆jang hăm ƀok Nguyễn Hải Ninh, Bí thư Anih jang Đảng dêh char Khánh Hòa păng dôm anih jang ƀơm truh pơma dơnuh tơdrong jang hơdai pơgơ̆r tơdrong joh ayŏ kơ dŏ soang “Pran, pơdrŏng đơ̆ng đak dơ sĭ pơlei pơla”. Tơdrong joh ayŏ kơ dŏ soang “ Pran, pơdrŏng đơ̆ng đak dơ sĭ pơlei pơla” yua đơ̆ng Anih radiô nơ̆r pơma Việt Nam (VOV) jang hơdai hăm Ban Tuyên giáo Trung ương, Anih jang Chĭnh trĭ Khŭl linh Kon pơlei Việt Nam - Anih tơm vei lăng Khŭl linh păng Anih vei lăng kon pơlei dêh char Khánh Hòa pơgơ̆r.

Tơdrong jang pơ dui đunh 90 pơnĭt, tơchĕng hơdrol pơgơ̆r lơ̆m gơmăng ‘năr 15/8/2023 tơ̆ gơng tơnŏk Học viện Hải quân, pơlei tơm Nha Trang. ‘Nâu jĭ tơdrong jang đei pơgơ̆r kơ teh đak. Tơdrong tơm tơdrong jang akŏm lăng dơ̆ng pơtôch bơ̆jang kiơ̆ tơdrong Tơchơ̆t Hop akŏm XIII kơ Đảng lơ̆m dôm tơring đak dơ sĭ, achon đak dơ sĭ đơ̆ng blŭng jăl jang truh dang ei.