Băt hơdăh hơnăp jang gĭt kăl kơ tơring Tây Nguyên, đơ̆ng sơnăm 1993, Kơdră vei lăng Anih radiô nơ̆r pơma Việt Nam hlôi tơchơ̆t pơjing Anih jang oei tơ̆ tơring Tây Nguyên pơm tơ̆ Buôn Ma Thuột, ƀơ̆t doh sơ̆ ‘noh thị xăh  kơ dêh char Dak Lak. ‘Nâu jĭ 1 trong jang tôch kơ trŏ ƀlep đei tơdrong gĭt kăl, ưh khan lăp tơƀôh tơdrong kơchăng lơ̆m tơdrong pơih să hơtŏk tơiung tih ‘lơ̆ng kơ Anih radiô nơ̆r pơma Việt Nam, mă oei đei tơdrong ‘lơ̆ng chĭnh trĭ gĭt kăl lơ̆m tơdrong tơring Tây Nguyên tŏk bŏk yak tŏk hơdai hăm teh đak. Ƀok Lê Đình Đạo, sơ̆ pơm Phŏ Kơdră dơnơm vei lăng Anih radiô nơ̆r pơma Việt Nam, jĭ Kơdră Anih jang tơ̆ tơring Tây Nguyên mă blŭng, ƀlơ̆k dơ̆ng:

“Anih jang radiô oei tơ̆ tơring Tây Nguyên chăl doh sơ̆ ‘noh găh bơngai jang lăp đei 3, 4 kang ƀô̆ đơ̆ng Hà Nội năm. Nhôn athei pơma dơnuh păng pơgơ̆r chă rơih đe oh đĭ tốt nghiệp Đại học Tây Nguyên, păng năm trŭh tơ̆ rim pơlei pơla tơchă đe oh gơh jang, gơh pơgơ̆r jang dôm tơdrong jang pơ re nơ̆r hăm nơ̆r kon kông. Oei anih jang, tơmam ki thuơ̆t, kŭm đei tơdrong tơgŭm đơ̆ng dôm anih jang tơ̆ tơring thị xăh Buôn Ma Thuột kơplăh doh sơ̆, ‘noh nhôn hlôi thuê đei 1 hơnih hnam hmă, tơ năr gŏch  10 pơbŭng pơm phi brô xi măng vă pơm hơnih oei hai, pơm hơnih bơ̆jang hloi.”

Bơngai chih hla ar tơroi Y Khem Niê jĭ 1 lơ̆m dôm bơngai tơblơ̆ păng pơre nơ̆r Ê Đê mă blŭng kơ Anih radiô nơ̆r pơma Việt Nam oei tơ̆ tơring Tây Nguyên. 30 sơnăm đĭ hloh bơ̆ih mă lei tơdrong ƀlŏk găh dôm jơ pơih pơ re blŭng a đơ̆ng VOV Tây Nguyên oei nhen đêl blŭng.

“Yua kơ ƀơ̆t doh sơ̆ ưh kơ đei kơmăy tĭnh nhen dang ei vă kơ mơ̆ng dơ̆ng. Ƀrŏk tơ̆ hnam ‘noh pơih  rađiô mơ̆ng dơ̆ng nơ̆r đŏk đơ̆ng kơdih. Pơih ăn kơ ƀok yă, kon hơkăn tơ oei mơ̆ng ngôi. Mơ̆ng nơ̆r đŏk đơ̆ng kơ dih. Chhôk hơ iă dêh văi.”

30 sơnăm âu ki, dôm bơngai jang chih hla ar tơroi VOV tơ̆ Tây Nguyên tơ pă jing dôm bơngai iung jang hơdrol lơ̆m mặt trân đon tơchĕng joh ayŏ; jang ‘lơ̆ng hơnăp jang chih kơtơ̆ng ang kach mang: jĭ bơngai tơroi tơbăt trong jang đơ̆ng Đảng, tơdrong jang tơgŭm păng khôi luơ̆t đơ̆ng Teh đak. Pơtruh tơdrong kơtơ̆ng ang hrĕnh - ƀlep, tơtom. Hơdai hăm pơma tơblang tơƀôh, găn lê̆ dôm tơdrong pơma kư̆ kă, ưh kơ trŏ, roi tơƀôh đon hơlĕnh pơdăr đơ̆ng khŭl kơ nê̆ ‘meh chă trong tơ jră phă ngơ̆r teh đak, tơgop gĭt kăl lơ̆m tơdrong hơtŏk tơiung kơ Tây Nguyên. Dôm jĭt jơnei hla ar chih kơtơ̆ng ang teh đak lơ̆m dôm sơnăm âu ki hlôi đei pơjao ăn kơ dôm bơngai chih hla ar tơroi kơ VOV Tây Nguyên, jĭ tơdrong lăng, chih iŏk tơ găl đơ̆ng Đảng păng Teh đak hăm dôm tơdrong hơdrin đơ̆ng khŭl kang ƀô̆ chih kơtơ̆ng ang kơ Anih jang oei tơ̆ tơring Tây Nguyên.

Chih iŏk tơdrong tơgop đơ̆ng Anih jang oei tơ̆ tơring Tây Nguyên, Đảng, Teh đak hlôi đei lơ tơmam hơpăh nhen Mê đai bơ̆jang dơ̆ng mă pêng, mă 2 păng mă 1 lơ̆m dôm sơnăm 2004, 2008 păng 2015; Hla kơ pơjei băl đơ̆ng Khŭl kơdră teh đak sơnăm 2018. Bơngai chih hla ar tơroi Vũ Hải Định, Kơdră vei lăng VOV tơring Tây Nguyên tơbăt:

“Nhôn lăng kăl tơdrong tơplih ‘nao ‘lơ̆ng tơdrong tơm dôm tơdrong pơre nơ̆r kon kông kiơ̆ trong vang jang hơdai ‘lơ̆ng, tơ jê̆ hăm kon pơlei kon kông. Nhôn lăng kăl lơ̆m 1,2 kơ loăi chih ƀai, apĭnh jet, mă loi ‘noh jĭ kơ loăi ƀai chih tơƀlang hơdăh, pơma dơnuh jrŭ, đei tơƀôh ‘lơ̆ng lơ̆m tơpôl. Bơngai chih hla ar nhôn ưh kơ ‘nhoen năm tơ̆ dôm tơring mơmat tat; mă loi ‘noh lơ̆m khei ‘năr Covid. Mă 2 ‘noh jĭ nhôn tơmơ̆t jên jang hơtŏk tơiung bơngai jang pơm lăp hăm ‘meh vă đơ̆ng hla ar kơtơ̆ng ang chăl hle. Nhôn lăng kăl lơ̆m kơmăy kơmŏk kơ sô̆, hơtŏk ‘lơ̆ng đơ̆ng tơdrong jang vei lăng truh tơdrong bơ̆jang chih kơtơ̆ng ang đơ̆ng bơngai chih hla ar kơ tơ̆ng ang. Lơ tơdrong jang tơchĕng hơlen, hơnăn khoa hŏk, pơcheh hơgei tơplih ‘nao ki thuơ̆t hlôi tơmơ̆t yua lơ̆m yan âu, vei sơđơ̆ng ‘lơ̆ng.”

Rim jơhngơ̆r kơdră chĕp kơ̆l, bơngai jang kơ Anih Radiô nơ̆r pơma Việt Nam oei tơ̆ tơring Tây Nguyên chhôk hơiă tơgop lơ̆m tơdrong hơtŏk tơiung kơ Tây Nguyên. Ƀok Đỗ Tiến Sĩ, Bơngai jang lơ̆m Khŭl chĕp kơ̆l pơgơ̆r Trung ương Đảng, Kơdră dơnơm vei lăng Anih radiô nơ̆r pơma Việt Nam tơbăt:

 “Anih jang oei tơ̆ Tây Nguyên gô hơnơ̆ng hơtŏk tơdrong joăt joe 1 jơhngơ̆m đon, hơbĕch hơbal, pơcheh hơgei; tơklep hơdai yan âu, roi tơbăt hrĕnh hơiă tơtom. Mă lei hơdai hăm ‘noh pơih đei dôm trong jang ‘nao vă bơ̆n gơh roi tơbăt, bơ̆jang kiơ̆ hơnăp jang roi tơbăt găh trong jang tơgŭm đơ̆ng Đảng, teh đak kŭm nhen dôm dêh char, pơlei tơm lơ̆m tơring Tây Nguyên hăm kon pơlei pơma atŭm mă loi ‘noh kon pơlei kon kông pơma hơdrô̆. Vă kiơ̆ đơ̆ng noh ƀôh đei tơdrong bơngơ̆t truh đơ̆ng Đảng, teh đak, mă lei hơdai hăm ‘noh kŭm ƀôh đei tơdrong hơdrin 1 jơhngơ̆m đon tơ goăt tơgoăl đơ̆ng lơ ŭnh hnam dôm hơdrĕch hơdrŭng Việt Nam đei tơroi hơiă tơ̆ tơring Tây Nguyên. Păng tơ̆ hơnăp kơnh ĭnh lui ngeh akhan Anih jang oei tơ̆  Tây Nguyên gô hơtŏk ‘lơ̆ng jơhngơ̆m đon tơgoăt tơgoăl vă hơtŏk loi dơ̆ng pơma dơnuh tơdrong joăt jang vă kơ bơ̆n pơjing khŭl jang chih kơtơ̆ng ang đĭ ‘lơ̆ng bơih ‘noh ‘lơ̆ng hloh dơ̆ng. Bơ̆n đei khŭl jang tơgŭm lăp vă hơtŏk ‘lơ̆ng hloh dơ̆ng kơtơ̆ng ang đơ̆ng tơring.”

Tơbăt 30 sơnăm pơjing Anih jang oei tơ̆ Tây Nguyên jĭ 1 tơdrong ‘lơ̆ng gĭt kăl. Đơ̆ng tơdrong ‘lơ̆ng âu, đĭ đăng kang ƀô̆, bơngai chih kơtơ̆ng ang, bơngai chih hơmet ming, bơngai jang ki thuơ̆t păng bơngai jang lơ̆m đĭ đăng anih jang gô yak rok dôm jơhnơr năm hơdrol vă oei hơdai lơ̆m hnam atŭm  VOV hơnhăk nơ̆r pơma Việt Nam roi ‘năr roi yak hơtăih./.