Yak hlŏh 30 sơnăm pơjing păng jang tŏk, đơ̆ng 4 ‘nu bơngai blŭng a, dang ei đĭ đei truh 60 ‘nu bơngai, găh 8 hơdrĕch hơdrung, jĭ Anih chih tơdrong kơtơ̆ng ang tih hlŏh đơ̆ng Radio nơ̆r pơma VN tơ̆ tơring. Jô̆ păh lăp rim sơnăm, Anih Radio nơ̆r pơma VN tơ̆ tơring Tây Nguyên chih đei hlŏh 2.000 ƀai. Dôm tơdrong tơroi hăm 6 nơ̆r kon kông đei: Rađe, Jarai, Bahnar, Xơ Đăng, K’Ho păng M’Nông đei lơ tơdrong tơplih ‘nao, tôch hơiă hăm kon pơlei, akŏm đĭ đăng jơ pơih 1 năr ‘nŏh 17 jơ 1 puăt (đơ̆ng 5h00’ pơgê truh 11 jơ 1 puăt kơmăng).

Pơma tơ̆ hop akŏm, Kơdră jang tơm Trung ương Đảng, Kơdră chĕp kơ̆l Radio nơ̆r pơma VN Đỗ Tiến Sỹ pơma hơdăh, tơ̆ hơnăp kơnh vă jang hơdoi kơjăp hlŏh dơ̆ng hăm dôm dêh char Tây Nguyên lơ̆m tơdrong tơroi tơbăt. Radio nơ̆r pơma VN vă hơnơ̆ng tơmât jên ăn rim Anih jang lơ̆m tĕh đak pơma atŭm păng naih jang tơ̆ Tây Nguyên pơma hơdrô̆ găh khul bơngai jang, tơmam drăm, kơmăy kơmŏk ki thuơ̆t kiơ̆ trong chih tơroi lơ kơmăy kơmŏk ‘nao. Kiơ̆ đơ̆ng noh, hơtŏk tơdrong đei yoa, kơsư̆k pơih rapor ăn tơring hơtăih yăih, tơring pơmat tat dêh hlŏh.