Dêh char Kon Tum tŏk bŏk đei lăng jĭ tơring tơnap tap hloh Tây Nguyên găh trong nơnăm. Dêh char tŏk bŏk hơpơi ‘meh vă đei trong gre rĕnh vă tơmơ̆t iŏk yoa, iung jang dôm tơdrong đei, tơdrong rơvơn, mă kăl bro tơmang pơhiơ̆ teh đak Măng Đen. Ƀok Lê Ngọc Tuấn, Kơdră chĕp pơgơ̆r Hơnih vei lăng kon pơlei dêh char Kon Tum tơbăt, mưh đei lơ ƀai chih tơbăt găh trong gre rĕnh tơ̆ Tây Nguyên đei rapor lơ̆m rim tơdrong rapor kơ VOV, khul kơdră chĕp pơgơ̆r dêh char Kon Tum jei hơnơ̆ng chă mơ̆ng. Lơ ƀai hlôi tơbăt hơdăh lơ tơdrong yan ou, tơbăt hơdăh ƀlep jơhngơ̆m đon hơpơi ‘meh vă đơ̆ng khul kơdră păng kon pơlei tơring. Hơdrô̆ dêh char Kon Tum, tơdrong chơt hơ iă hlôi truh hrôih, mư̆h lơ̆m trong pơprŏ tơring Tây Nguyên chăl sơnăm 2021-2030 đei tơbăt hơdăh hơtuch khei 6 ou ki, jăl trong rĕnh Quảng Ngãi- Kon Tum hlôi đei Thủ tướng teh đak tơmơ̆t lơ̆m pơprŏ jang. Kiơ̆ kơ ƀok Lê Ngọc Tuấn, trong să vă jê̆ pơm ăn Kon Tum atŏk kơtang atŏk tơ iung.“Chă lăng dôm ƀai chih kơ VOV găh rim trong rĕnh lơ̆m tơring Tây Nguyên ba ƀôh tôch trŏ lăp hăm tơring. Găh tơdrong ou, ou ki Thủ tướng Teh đak hlôi pơma hơdăh dơ̆ng, jei drơ̆ng nơ̆r dơ̆ng. Hrei ou nhôn ‘meh vă hrôih đei rim jăl trong glung rĕnh. Hơdrô̆  jăl trong glung rĕnh Quảng Ngãi- Kon Tum ‘noh 2 dêh char vang apĭnh Khul kơdră teh đak vă tơchă tơ-‘ngla tơmơ̆t jên jang kiơ̆ trong jang PPP.”    

Yă Nguyễn Thị Thanh Lịch, Kơ iĕng Kơdră Hơnih vei lăng kon pơlei dêh char Gia Lai tơbăt, hơnih tơhlăk tơhlĭn tih hloh kơ dêh char Gia Lai pơma hơdrô̆, tơring Tây Nguyên pơma atŭm ‘noh trong nơnăm tim mă sơđơ̆ng. Dôm sơnăm ou ki dêh char hlôi hơdrin lơ̆m krao hơvơn rim tơ-‘ngla tơmơ̆t jên jang, mă kăl ‘noh pơm lơ liơ pơjing đei rim hnam kmăi pơm tơlĕch ‘lơ̆ng ăn rim tơmam drăm choh jang sa, pơm hơtŏk kơjă tơmam drăm păng jang sa iŏk yua kơjăp ăn kon pơlei. Mă lei, tơdrong tơhlăk tơhlĭn găh trong nơnăm hlôi “găn ga” rim bơngai tơmơ̆t jên jang năm truh hăm Gia Lai. Kiơ̆ kơ yă Nguyễn Thị Thanh Lịch, tơdrong tơmơ̆t jên jang rim trong glung rĕnh Pleiku – Qui Nhơn păng trong glung rĕnh Tu-Pơbăh găh Pơmơ̆t jĭ tôch gĭt kăl hăm pơjing, atŏk tơ iung rim hnam kmăi pơm tơlĕch tơmam drăm tih să, rim hơnih jang kmăi kmŏk păng hơnih jang kmăi kmok pơm tơlĕch tơmam drăm ‘lơ̆ng … Đơ̆ng noh, gô xek tơlang lơ tơdrong găh bơngai jang, tơdrong jang ăn kon pơlei tơring. Tơplih ăn kăl chă yak năm tơ̆ rim pơlei tơm tih, hơnih jang kmăi kmŏk vă tơchă tơdrong jang, jang sa iŏk yua ưh sơđơ̆ng, mơjĭt rơbou ‘nu kon pơlei tơring đei rơvơn đei tơdrong jang sơđơ̆ng.“Mưh chă đŏk lơ ƀai chih đơ̆ng VOV ‘noh nhôn tôch hơ iă. Nhôn chă pơtruh dih băl lơ̆m rim khul kơ Khul kơdră chĕp pơgơ̆r, khul kơ rim hơnih bơ̆ jang păng khul rim tơring. Nhôn ƀôh akhan jei mĭnh nơ̆r ƀơ̆r đon vang chă tơbăt dih băl. Khul kơdră nhôn ‘noh jei hlôi chă apĭnh bơih mă lei hăm tơdrong jang kơtơ̆ng ang ‘noh tơgop pơm hơdăh hloh dơ̆ng dôm tơdrong ƀôh kơmăt băt kơđon, pơ đĭ dôm tơdrong trŏ lăp mă rim ‘măng hop akŏm kơ Trung ương ‘noh tơgop lơ̆m tơƀôh hơdăh hloh dơ̆ng vă Trung ương tơmơ̆t jên jang, hơmet pơ ‘lơ̆ng tơdrong tơhlăk tơhlĭn ăn Tây Nguyên găh trong nơnăm.”

 ‘Nhŏng Lý Văn Thanh, oei tơ̆ tơring Dak Sôr, apŭng Krông Nô, dêh char Dak Nông tơbăt, tơdrong tơmơt jên jang ming man trong gre hrei ou oei tim gan kơtang, dôm tơmam drăm choh jang sa, plei ‘long kon pơlei jang sa đei tơnap mă tĕch hlot păng đei ƀơm truh găh kơjă tĕch răt. ‘Nhŏng Thanh akhan, teh đak kăl lăng ba hloh dơ̆ng truh tơmơt jên jang pơm trong nơnăm, mă kăl ‘noh dôm trong glung rĕnh vă Tây Nguyên atŏk tơ iung. “Lơ̆m teh đak tŏk bŏk rơ ông rơ ang pơm trong glung rĕnh mă lei rim tơring tơ̆ Tây Nguyên oei tŏk bŏk gô chang. Kon pơlei Tây Nguyên đei yă kiơ, đei teh jing ‘lơ̆ng, đei chehphe, sâu riêng, dôm ‘long pơtăm kăp gĭt; mă lei kon pơlei Tây Nguyên bơ̆n ưh kơ đei yă kiơ, ưh kơ đei trong glung rĕnh, ưh kơ tôm trong chă yơ yak sơđơ̆ng vă mơdro sa. Đŏk lơ ƀai chih đơ̆ng VOV chih găh trong glung rĕnh tơ̆ Tây Nguyên ĭnh bôh pơma tôch kơ ƀlep, tôch kơ kyăp. Đảng, Teh đak kăl lăng ba hloh dơ̆ng truh tơring tơnap tap nhen Tây Nguyên ‘noh mă atŏk tơ iung tĕnh koăng păng kơjăp ‘lơ̆ng.”.