Pơma tơ̆ jơ pơm lêh, Kơdră jang lơ̆m Trung ương Đảng, Kơdră chĕp kơ̆l Radio nơ̆r pơma Việt Nam Đỗ Tiến Sỹ akhan, lơ̆m 30 sơnăm âu ki, khŭl kăn ƀô̆, bơngai jang tơ̆ Anih pơih pơre nơ̆r kon kông đei lơ tơdrong tơgop git kăl ăn tơdrong jơnei atŭm lơ̆m hlŏh 78 sơnăm jang tŏk đơ̆ng Radio nơ̆r pơma Việt Nam păng hơtŏk dơ̆ng kơjă kăp gĭt, jơhngâm pran đơ̆ng 1 anih chih hla ar tơroi, roi tơbăt hăm lơ kơmăy kơmŏk truh hăm rim răih bơngai mơ̆ng lơ̆m păng ‘ngoăih kơ teh đak.

Lơ̆m chăl ‘nao, athei hơmet kơjăp tơdrong tơguăt đĭ đăng hơdrĕch hơdrung, tưk tơiung jơhngâm pran, jang tŏk pran hlŏh dơ̆ng hăm lơ tơdrong tơgop đơ̆ng kon pơlei, tưk tơiung jơhngâm pran, đon jang tơnăp, gơ̆h hơgei đơ̆ng rim bơngai Việt Nam, hơtŏk đon hơpơi ‘mĕh jang tŏk đơ̆ng đĭ đăng hơdrĕch hơdrung. Ƀlep ƀât ‘măng mă âu, Anih pơih pơre nơ̆r kon kông đei Radio nơ̆r pơma VN, dôm Anih tơm, anih jang kơpal kơ Trung ương, tơring tơrang hơpăh ăn Ƀăng khen chih tơbăt dôm tơdrong tơgop ‘lơ̆ng, đei yoa đơ̆ng đe kăn ƀô̆, bơngai chih tơdrong kơtơ̆ng ang, bơngai chih hơmet ƀlep ƀât tơbăt 30 sơnăm pơjing.