Kiơ̆ kơ ‘noh, Ban Bí thư Tơchơ̆t ăn kơ yă Huỳnh Thị Chiến Hoà, Bơngai jang lơ̆m Khŭl chĕp kơ̆l pơgơ̆r Anih jang Đảng dêh char, Kơdră Jơnŭm pơgơ̆r kon pơlei dêh char Đắk Lắk pơm Phŏ Bí thư Anih jang Đảng dêh char jăl jang 2020 -2025. Yă Huỳnh Thị Chiến Hòa rơneh ‘năr 18/4/1973, pơlei pơla tơ̆ Quảng Ngãi. 

Hơdrol kơ iŏk kơchư̆k pơm Phŏ Bí thư Anih jang Đảng dêh char Đắk Lắk, yă Huỳnh Thị Chiến Hòa hlôi pơm dôm kơchư̆k: Phŏ Kơdră Anih Tơlĕch nơ̆r sơkơ̆t păng Tơmơ̆t jên jang dêh char Đắk Lắk; Kơdră vei lăng Anih jang Ngoại vụ Đắk Lắk; Bơngai jang lơ̆m Khŭl chĕp kơ̆l pơgơ̆r, Kơdră Ban Tuyên giáo Anih jang Đảng dêh char Đắk Lắk; Kơdră Jơnŭm pơgơ̆r kon pơlei dêh char Đắk Lắk. Pơma iŏk hơnăp jang, yă Huỳnh Thị Chiến Hoà tơbăt gô hơdrin đĭ jơhngơ̆m lơ̆m kơchư̆k jang ‘nao, hơdrin tôch ai, tơtĕnh gơh jang hơnăp jang ‘nao kŭm hăm đĭ đăng kơdră chĕp kơ̆l dêh char Đắk Lắk mĭnh jơhngơ̆m đon, khŏm jang mă đei, jăh hơnhăk Đắk Lắk hơtŏk tơiung, sơđơ̆ng.