Pơgê ‘năr 21/3/2024, Hop akŏm ưh ê ‘măng mă 6, Quốc hội jăl XV pơgơ̆r tơ̆ Hnam Quốc hội, Anih tơm Hà Nội hăm tơdrong pơgơ̆r đơ̆ng Kơdră Quốc hội Vương Đình Huệ vă hơlen năng, asong pơdơ̆h jang pơm Kơdră teh đak Cộng hòa xã hội chủ nghĩa Việt Nam jăl jang 2021 - 2026 păng asong pơdơ̆h jang pơm bơngai tang măt Quốc hội jăl XV hăm ƀok Võ Văn Thưởng găh Khul tang măt Quốc hội plt Đà Nẵng.

Đơ̆ng rŏng mơ̆ng dôm hla ar chih tơroi, nơ̆r pơma đơ̆ng ƀok Võ Văn Thưởng, Quốc hội pơgơ̆r pơma nuh, tăh kơ phĭu srĕp păng drơ̆ng nơ̆r yơ̆r ti ăn tơdrong asong pơdơ̆h pơm Kơdră teh đak Cộng hòa xã hội chủ nghĩa Việt Nam jăl jang 2021 - 2026 păng asong pơdơ̆h pơm Bơngai tang măt Quốc hội jăl XV hăm ƀok Võ Văn Thưởng găh Khul tang măt Quốc hội plt Đà Nẵng.

Đơ̆ng rŏng kơ pơtôch Hop akŏm ưh ê ‘măng mă 6, Quốc hội jăl XV, lăng kiơ̆ Khôi luơ̆t tơm teh đak Cộng hòa xã hội chủ nghĩa Việt Nam păng tơdrong hơgăt đơ̆ng luơ̆t đei ƀơm truh, Anih chĕp kơ̆l pơgơ̆r Quốc hội hlôi tơlĕch hla ar chih tơroi găh tơdrong pơjao hơnăp jang pơgia pơm Kơdră teh đak Cộng hòa xã hội chủ nghĩa Việt Nam. Kiơ̆ kơ ‘nŏh, yă Võ Thị Ánh Xuân, Phŏ Kơdră teh đak, iŏk jang pơgia kơchư̆k pơm Kơdră teh đak Cộng hòa xã hội chủ nghĩa Việt Nam đơ̆ng ‘năr 21/3/2024 klep truh Quốc hội pôk rơih đei Kơdră teh đak ‘nao.