Dôm tơdrong jang joh ayŏ, kơđŏ soang, lêh gô pơgơ̆r prăt năr Têt tơ̆ lơ hơnih lơ̆m dêh char Đắk Lắk, nhen: Năr joh ayŏ dôm hơdrĕch hơdrŭng apŭng Ea Kar păng pơlong hao thŏng nan yă grai, thŏng nan Kayak tơ̆ apŭng ‘nâu (đơ̆ng ‘năr 4 - 6 Tết); pơlong hao thŏng nan joăt joe apŭng Krông Ana (‘năr 7 Tết); Lêh joh ayŏ kră sơ̆ Việt Bắc tơ̆ apŭng Krông Năng (đơ̆ng ‘năr 13 - 15 khei Mônh âm); Pơlong tơket joăt joe apŭng Krông Pắk pơih să păng pơgơ̆r hơri quan họ (đơ̆ng ‘năr 15 - 17 khei Mônh âm).

Mă loi ‘noh, lơ̆m gơmăng sơng sơnăm ‘nao, tơ̆ Cham să 10/3, pơlei tơm Buôn Ma Thuột pơgơ̆r tơdrong joh ayŏ kơdŏ soang “Chơt hơiă kơ Đảng, chơt hơiă kơ pơyan puih mak Ất Tỵ sơnăm 2025” păng prăh hơmlăi pơkao. Hơdai hăm ‘noh, tơ̆ hơnih kơ drơ̆m dôm apŭng Ea H’Leo, Krông Buk, Krông Ana păng Ea Kar kŭm pơgơ̆r joh ayŏ kơdŏ soang păng pơgơ̆r prăh hơmlăi pơkao pơyua ăn kon pơlei lăng hơdrol kơ jơ sơng sơnăm ‘nao.