Pơgơ̆r tơ̆ Anih mong đŏk hla ar dêh char Đắk Lắk đơ̆ng dang ei truh đĭ ‘năr 2/2 truh, Năr Hla ar  tơroi Pơyan Puih mak Ất Tỵ dêh char Đắk Lắk ming pơdă vă jê̆ 250 kơsơ̆p hla ar lơ kơloăi, hlŏh 1.000 blăh hla ar đŏk păng kơhrĕng kơsô̆ hla ar chih kơ Pơyan Puih mak. Kŭm hăm ming pơdă, lơ ƀai chih oei hơtŏk lơ̆m mang tơgŭm ăn bơngai đŏk chă đŏk hiôk hian ƀiơ̆. Đơ̆ng rŏng kơ ‘nŏh, dôm hla ar tơroi gô đei hơnhăk hơpăh ăn rim Hnam hŏk hôp tơpôl tơ̆ pơlei pơla tơring hơtăih yăih kơ dêh char.

Ƀok Nguyễn Văn Phú, Kơdră vei lăng Khul chih hla ar tơroi dêh char Đắk Lắk ăn tơbăt: sơnăm ‘nâu, dôm ƀai chih kơ pơyan puih mak tơƀôh hơdăh tơdrong jang chinh trĭ, mŭk drăm, tơpôl, jơhngâm pran, bưng ai đơ̆ng kon bơngai Việt Nam, tơdrong jơnei đơ̆ng jang xa, năm truh tơdrong arih xa ning mônh kơnh tôch ‘lơ̆ng hơiă kơ teh đak, tơƀôh hơdăh jơhngâm đon lơ̆m “Chăl jang tŏk đơ̆ng hơdrĕch hơdrung”.