Iŏk yua cham char plenh teh 'lơ̆ng rŏ, oei lơ̆m tơring teh pơtăm sâm Ngọc Linh Kon Tum, kon pơlei tơ̆ pơlei Tu Thó atŭm hăm minh ƀar anih asong jang hlôi pơjing đei anih tơmang homestay, pơm lơ pơgar pơkao, 'long pơrŏ; akŏm đei khul pơdreh tôn chĭng chêng – hơsuang, khul pai xa jong ăn tơmoi truh tơmang. Sơnăm âu ki, pơlei Tu Thó sơng 5.000 'nu tơmoi. Ah lêh tơbang Tơchơ̆t đơ̆ng Anih jang vei lăng kon pơlei dêh char Kon Tum sơkơ̆t pơlei oei 'nao Tu Thó, xah Tê Xăng 'noh Pơlei tơmang pơhiơ̆ cham char, Anih jang vei lăng kon pơlei apŭng Tu Mơ Rông pơgơ̆r tĕch pơlong kơjă 1kĭ sâm Ngọc Linh, tơgŭm kon pơlei pơm hnam kơjung vă sơng tơmoi truh tơmang.

Ƀơ̆t 'măng âu, Anih jang Joh ayŏ, Tơplŏng kơdâu păng Tơmang pơhiơ̆ dêh char Kon Tum adoi asong ăn kon pơlei Tu Thó minh hơmrŭk chĭng chêng gĭt. Tơdrong mă pơlei Tu Thó tơ̆ tơring pơtăm sâm Ngọc Linh Kon Tum đei sơkơ̆t jĭ pơlei tơmang pơhiơ̆ cham char pơih đei trong hiôk vă hơtŏk jang tơmang pơhiơ̆ păng vei răk tơƀăk mong joh ayŏ juăt jue kơ kon pơlei Xơ Đăng.