Kiơ̆ khôi kră sơ̆ kơ kon pơlei Jrai, đơ̆ng rŏng kơ lôch, pơhngol bơngai lôch adoi oei tơ̆ âu tơ̆ to, bơngai lôch păng bơngai hơrih oei tơrĕk dih băl. Kơyuơ noh, rim năr bơngai hơrih adoi oei năm hơpong pơsat 'nhŏng oh, hơpuih pơ-'nguaih rơgoh păng 'nhăk por 'nhot ăn bơngai lôch hơchăng. Đơ̆ng rŏng kơ đunh khei năr, tơdrong jang âu pơtôch đơ̆ng rŏng kơ đe pơgơ̆r et brư̆.

Vă pơm brêm lơ̆m brư̆, le lăi hăm pơhngol kiăk, đe rơih anih trôk tơblĕnh 'lơ̆ng păng pik jơ̆p hơkâu bơngai hơrih. Pơm rup roi kơnê̆, roi krưp roi le lăi hăm kiăk noh roi 'lơ̆ng. Lơ̆m brư̆ athei đei Bram. Pơmai Siu Thỏi, bơngai Jrai oei tơ̆ xah Ia Mơ Nông, apŭng Chư Păh, dêh char Gia Lai ăn tơbăt:

"Kiơ̆ khôi kră sơ̆ kơ bơngai Jrai ah pơgơ̆r et brư̆ athei đei bram. Iŏk trôk pik tơ̆ ƀŏ hơkâu jăn vă pơm bram"

Bơngai Jrai tơchĕng Bram noh pơhngol kiăk 'lơ̆ng, vei vêr bơngai lôch ưh đei ƀơm kiăk kơnê̆ pơrăm, dah mă jĭ pơhngol kơ bơngai lôch plôk vih tơ̆ plei teh, atŭm et xa sô̆ hăm pơlei pơla tăp dăr pơsat. Pơmai Rơ Châm H’Xuyết, bơngai Jrai oei tơ̆ xah Ia Mơ Nông, apŭng Chư Păh, dêh char Gia Lai ăn tơbăt:

"Đe pơm bram lơ̆m et brư̆. Ah mă pơm bram noh đe ôn muh măt, ôn hơnăn. Muh măt pơm bram pik trôk tơ̆ muh măt dah mă truơ̆ mul meo pơm đơ̆ng tơm prit vă klŭ lê̆ ƀŏ kơ bơngai pơm bram. Bram pơtih ăn bơngai hlôi lôch hơchăng hăm bơngai oei hơrih”.

Bơngai đei rơih pơm Bram noh bơngai pran jăng, đei kon pơlei lui yom. Pơm athei mă 'lơ̆ng, vă kơ bơngai nai ưh đei kơnăl kơ po, mưh đe oei kơnăl noh dang vă akhan  Bram ưh đei pơm keh sơnong jang păng ƀơm kiăk rôp.

Pơmai Rơ Châm Hà, bơngai Jrai, oei tơ̆ xah Ia Mơ Nông, apŭng Chư Păh, dêh char Gia Lai ăn tơbăt:

"Bram hơnơ̆ng đei pơm ăn brư̆ đĕch, oei năr hmă noh ưh đei ôh. Hơdrô̆ đe drŏnglo đĕch pơm bram oei drăkăn ưh đei pơm brêm ôh. Hơnơ̆ng noh bơngai 'lŏ sơnăm păng đe hơ-ioh đĕch pơm brêm, kiơ̆ kơ tơdrong kăl kơ unh hnam pơgơ̆r brư̆. Sơ̆ đe pơm bram noh tôch giĕng. Bơngai pơm bram noh đe drŏnglo hơdro dah mă tam oei unh om"

Bram hơnơ̆ng đei kŭp yom, athei đei khul tôn chĭng chêng sơng đơ̆ng anih pơm truh tơ̆ pơsat. Đơ̆ng rŏng kơ pơm Bram ah pơsat, noh Bram vih hơlơ̆k hăm tơdrong hơrih tơpă. Dôm bơngai pơm Bram atŭm hăm kon pơlei et xa, hơsuang, pơma dơnuh rơ-ông rơ-ang. Pơmai H’Uyên Niê, Phŏ Kơdră Jơnŭm jang gah Drăkăn xah Ia Mơ Nông ăn tơbăt: 

"Bram đei ƀôh lơ̆m et brư̆ đĕch, oei 'năr hmă noh ưh kơ đei. Bram pơtih ăn pơhngol kơ dôm bơngai hlôi lôch hơchăng, đe vih vă et xa sô̆ ah 'măng mă hơtuch luch đĭ đăng. Đơ̆ng rŏng kơ 'noh, đe ưh đei 'nhăk por 'nhot truh tơ̆ pơsat ăn bơngai lôch bơih. Bram 'noh bơngai hơrih tơpă mă lei tơplih jing um ai pơhngol kiăk. Bram gơh chă akŏm pơma dơnuh, yak tăp dăr pơsat vă pơma dơnuh hăm unh hnam kơtum kơtŏng 'măng mă hơtuch luch vă tơklah ti yak hơrih tơ̆ plenh teh mă nai".

Bơngai Jrai lui, bơngai lôch păng bơngai oei hơrih đei tơdrong tơrĕk dih băl. Pơm Bram lơ̆m brư̆, vă tơƀôh đon băt, tơdrong 'mêm đơ̆ng bơngai oei hơrih hăm bơngai hlôi lôch. Đe hơpơi 'meh pơhngol bơngai lôch pring vei, tơgŭm ăn bơngai oei hơrih gơh grăng pran, pơlei pơla đei tơdrong hơrih sơđơ̆ng sơnêp sơnoi, phĭ tơtŏ dơnŏ 'lơ̆ng.